ريهام سعيد تعلق على الحكم بحبسها عام ونصف.. ماذا قالت؟

عبرت الإعلامية المصرية ريهام سعيد عن حزنها الشديد، إزاء الحكم الصادر ضدها بالحبس 18 شهر وغرامة 10 آلاف جنيه بتهمة السب والتشهير بالفتاة المعروفة إعلاميا بـ «فتاة المول».

ريهام كتبت على حسابها الشخصي على «الفيس بوك»: «انهارده بلدي كرمتني.. بعد ١٣ سنه بعالج كل الناس و بخدم كل الي حواليه. بعد ١٢ سنه فتحت مدرسه لذوي الاحتياجات الخاصه وعالجت الاف الأطفال بفضل الله مانمتش وماكلتش حتي فلوس والله ما اخدت. ضيعت عمري عشان اعمل حاجه للبلد دي. ضيعت حلم التمثيل الي تعبت فيه فالجامعة عشان ماسيبش الناس الغلابه. كنت مآشيه عكس التيار عشان أقول الحق. اخدت انهارده سنه و نص سجن. كنت بلف العالم أدور علي علاجات جديده للناس الغلابه و عمري ما قصدت و لا حاولت أشهر بحد. الاعلام مفهوش حاجه اسمها ستر مع أني ماتكلمتش لحد دلوقتي. ساعات الحقيقه بتكون فضيحه. كل الناس الي بتغلط وتشتم وتشهر بجد نجوم دلوقتي. المحامي بيقولي ده امر من فوق. فوق فين؟؟؟؟؟. كنت بقول تحيا مصر و يحيي العدل فين العدل؟ ريهام سعيد مجرمه لكن مرتضي مثلا عمره ما شهر بحد. خساره يا بلدي خساره مجهودي خساره يا مصر».

وأضافت: «فاكره لما كنت بنزل العريش لواحدي و اروح الإنفاق لواحدي و من غير تأمين و أقول عشان بلدي. فاكره لما رحت القدس أقول للفلسطينيين احنا معاكوا و مصر معاكوا ووقفت ادام الرصاص عادي و أقول عشان بلدي. فاكره لما جهزت مستشفي أطفال مصر و خليتها تعمل أضعاف العمليات لاطفال الي كانوا بيموتوا و أقول عشان أطفال بلدي. صرفت كل مليم معايه شخصيا علي الغلابه حسابي في البنك صفر وأقول عشان بلدي. كنت بقول لا دي مش بتمثل بنات مصر دي بتكدب برضوا عشان بلدي. فشلت في حياتي الزوجيه لأَنِّي ماكنتش بروح البيت نايمه في عربيه بلف علي المستشفيات كان نفسي يكون عندي أطفال اكتر فضلت أني بفضل الله احيي أطفال غيري. اول مره احس أني غلطانه غلطانه في حق نفسي. كنت فاهمه غلط. كنت فاهمه ان الي بيعمل صح وبيقول الحق حتي لو علي رقبته بلده بتكرمه. صعبان عليه نفسي اوي منك يا مصر. كل ده عشان مش مسنوده. كنت فاكره أني مسنوده بحبي ليكي و اخلاصي لشعبك. ايوه معملتش علاقات و لا أتوددت لحد. حبي للجيش و الشرطه كان من القلب. بجد تحيا مصر».

وتابعت: «الي قتل زينه اخد سبع سنين و الي رمي ميه نار شوه البنت اخد ٥ و مني عراقي صورت الناس من وراهم و قالت عليهم لمواغذه اخدت براءه. والي افترت علي الراجل و قالت متحرش وبتوزع صورها عريانه بطله. والي بيشتم في مصر والريس و الجيش بيقدم حفله الايميز و عايش ملك والسفله نواب مجلس شعب و العاهره و الراقصه هانم. و الاعلاميين الكذابين نجوم. تحيا مصر.ياما اتشهر بيه و بولادي ولا اخدت حقي. دي المره الرابعه الي اتحاكم فيها. غير ٥٠٠ محضر. رايحه جايه من النيابة. نسيت أقو لكم ان زينه الممثله بتقول أني شهرت بيهاورافعه قضيه و بتحاكم برضوا. تحيا مصر».