هادي خفاجة يعتزل التمثيل بسبب محمد سعد ويصفه \"بقليل الذوق\"

أعلن الفنان الشاب هادي خفاجة اعتزاله التمثيل في مصر بشكل نهائي، وذلك بسبب الفنان محمد سعد، وبرنامجه "وش السعد".

هادي خفاجة، قال عبر صفحته الشخصية بموقع "فيس بوك":  "قررت أنا هادى خفاجة اعتزال التمثيل نهائيا في مصر، وده بسبب الموقف اللي أنا هاحكيه، موقف في قمة قلة الذوق اللي في الدنيا".

وأضاف: "جاتلي مكالمة الساعة 12 بليل إن محمد سعد عايزني في تصوير في حلقة من برنامج "وش السعد" اللي هي كانت اليوم، وأنه عايز يقعد معايا، طبعا لبست و روحتله الساعة 1 بليل كان موجود الكاست كله ونجوم الحلقة أيتن عامر ومنة عرفة، وعملنا بروفة واتفقت مع مدير الإنتاج والملابس وكل حاجة وأستاذ سامح عبدالعزيز المخرج قعدت معاه واتكلمنا عن الشخصية، اتفقنا أن التصوير بعدها بيوم خلصت كانت الساعة 4 الفجر، روحت البيت نمت وصحيت، استعديت نفسيا إن رايح التصوير وحفظت السيناريو، وكان الميعاد الساعة 5 المغرب”.

وتابع: "بعدها لقيت اتصال وأنا في الطريق الساعة 4 العصر من واحد من مساعدين الإخراج بيقولي أستاذ هادى إحنا أجلنا الاسكتش بتاع حلقة حضرتك وهنكلمك نقولك إمتى التصوير إن شاء الله".

وأكمل هادي خفاجة بيانه قائلًا: “بفتح "MBC مصر"، لقيت الإسكتش بتاعي أتصور بممثل تاني! طب ليه اللف والدوران؟،  الحمد لله تاريخي مش هيقف على حلقة، بس موضوع تقدير، أنا حبيت أحكي لأني وسط حاجات كتير حصلتلي مكنتش مستحمل حركه زي دي، وبكرة بإذن الله هاكون في نقابة المهن التمثيلية وهسلم أستاذ أشرف زكي عضوية النقابة، لأنها متلزمنيش في شيء دلوقتي، بس بجد كفاية تدمير في المواهب وإحباط في الناس لأن الوسط بجد أصبح عصابات تتحكم فيه”.

واختتم: "إن شاء الله هكمل مستقبلى الفني في دولة تانية بتقدر الإنسانية قبل المواهب والمجالات وده قرار نهائي بجد بيني وبين نفسي مش هرجع فيه".