شقيق حسين الإمام ينشر صورة نادرة لهما ويوجه له رسالة.. شاهد

بمرور الذكرى الثانية على رحيل الفنان المصري حسين الإمام، وجه شقيقه الملحن مودي الإمام رسالة له معبرًا عن افتقاده الشديد له.

مودي نشر صورة نادرة مع شقيقه وقال: « أنا لسه باحس وأنا بعدي الشارع، إنك هاتاخدني من إيدي عشان أبقى في أمان وماتوهش، لسه عاوز أحكي لك أنا قد إيه بقيت سباح ماهر، وعن الشجرة العالية اللي تسلقتها، وعن آخر حيلة علمتها لروي كلبنا، لسه حاسس إني محتاج أوريك قد إيه أنا عازف ماهر على الدرامز والبيانو، والجيتار، ورسام ممتاز زي ما علمتني، لسه مستني تزورني عشان تعلمني چودو ومصارعة روماني، ونغني سوا، ونضحك لما عينينا تدمع زي ما اتعودنا، ولسه عاوز أطبخ لاثنين، عشان لو اتصلت وزرتني ناكل سوا وندردش، ونعزف ونغني».

شقيق الفنان الراحل أضاف: « لسه مستني رنة تليفونك وسؤالك عن صحتي، وأحوالي بإلحاح زي عوايدك، ولسه حاسس إنك هتزعق، وتخلي بلطجية حوش المدرسة يجروا من قدامك زي الفراخ وأنا واقف جنبك، قصير وفخور، ومزقطط، ولسه عاوز أثبت لك قد إيه أنا بقيت قوي، وماهر، وفاهم، وشجاع، لما بتكلم مع نفسي وأنا لوحدي بسمعك في صوتي، وبهدا، وأطمئن، وارتاح، ماعنديش شك إننا هانجتمع تاني زي عوايدنا، ونعزف سوا، ونغني كإننا روح واحد، لكن له عقلين، وجسمين، كل سنة وأنت بكل خير وسعادة، يا أخويا الكبير الحبيب.. يا حسين».

يُذكر أن حسين الإمام رحل في 17 مايو عام 2014 بعد تعرضه لأزمة قلبية أثناء احتفاله بعيد ميلاد زوجته سحر رامي بمنزله.