أمير طعيمة يوجه رسالة للراسبين في الثانوية العامة

وجه المؤلف أمير طعيمة رسالة لغير المتفوقين في الثانوية العامة وكذلك الراسبين على صفحته عبر «فيس بوك».

طعيمة كتب: «لكل الطلاب اللي ما جابوش مجموع كبير وعندهم إحباط وحتي للي ما نجحوش من الأساس: مين اللي قالك ان نجاحك في حياتك معناه انك تطلع يا دكتور يا مهندس، مين العبقري صاحب الفكرة دي ؟ النجاح انك تنجح في اي حاجة بتعملها وتبدع وتتفوق فيها، فيه مئات الألوف من الأطباء والمهندسين مش ناجحين في حياتهم و بالتبعية دخلهم ضعيف جدا، لا نجاحك ولا دخلك المادي ولا مستقبلك مرتبط بوظيفة معينة، وربنا لما بيوزع الرزق ما حطش نسبة معينة لوظائف معينة».

وأضاف طعيمة: «بطل هبل واقعد مع نفسك وشوف انت عايز ايه وبتحب ايه، فيه شباب بدأوا بعربية فول وعندهم مطاعم كبيرة دلوقت لأنه حب اللي بيعمله وأبدع فيه وما استسلمش، وغيرهم بدأ بمشاريع صغيرة وكبرها، وفيه اللي عنده موهبة ونماها وعافر وبقي أحسن من ناس كتير مجموعهم كان أكبر منه. دي مجرد موروثات وتابوهات و غالبا بعد ما تخلص رحلة التعليم ممكن تلاقي نفسك بتعمل حاجة تانية خالص بعيد عن اللي اتعلمته و مبسوط بيها. انت بتتعلم عشان تبقي مثقف وواعى وقادر علي الاستمرار في أي منافسة هتدخل فيها، بلاد الله واسعة والمجالات كتيرة، حدد هدف واسعي للوصول اليه وخلي عندك ثقة في الله ومن بعده في إمكانياتك وما تبطلش تحلم، انت مؤسسة بتحمل اسمك بدون لقب قبلها، شوف هتخلي المؤسسة دي تنجح ازاي وانت هتنجح حتي لو ما جبتش مجموع».