قصة «مايوه» ارتدته داليا البحيري أمام الفلاحين.. وكاد أن يتسبب في كارثة.. شاهد

استعادت الفنانة المصرية داليا البحيري ذكريات فيلمها «محامي خلع»، خاصة مشهد «المايوه»، الذي أحدث ضجة كبيرة وقتها.

الفنانة المصرية قالت: «المشهد ده تسبب في كارثة في التصوير.. إحنا كنا بنصور في العياط في أول طريق الصعيد، والناس هناك مكانتش شافت تصوير قبل كده، فقررنا أن مشهد المايوه يبقى آخر مشهد نصوره هناك، علشان لو حصل حاجة نلم العدة ونجري».

وأضافت، خلال استضافتها ببرنامج «ثلاثي ضوضاء الحياة» على قناة «الحياة»: «طول ما انا بصور ألاقي اهل البلد مركزين معايا أوي، اتاري الإنتاج كانوا بيصبروا الناس ويقولولهم هي هتلبس مايوه آخر يوم، والناس اللي ظهرت في المشهد بتاع المايوه مش كلهم مجاميع كان أغلبهم أهل البلد فعلا».

وتابعت إنها كانت تخشى من الإصابة بالبلهارسيا، حيث قالت: «الموضوع بالنسبة لي مكانش حاجة سهلة، خاصة إني كنت خايفة من البلهارسيا، فجابولنا حبوب للبلهارسيا لكن بعد كده اكتشفنا انها مكانش ليها لازمة لانها بتعالج البلهارسيا بعد الإصابة بها وليس للوقاية منها».

يذكر أن فيلم «محامي خلع» من بطولة هاني رمزي وداليا البحيري وعلا غانم ووحيد سيف، وهو من تأليف وحيد حامد وإخراج محمد ياسين.