سرقة كل محتويات منزل الإعلامية زهرة رامي.. تعرف على التفاصيل

كشفت الإعلامية الإذاعية زهرة رامي، عن تعرض منزلها للسرقة، حيث تمت سرقة كل محتوياته.

زهرة كشفت التفاصيل، على حسابها الخاص على "الفيس بوك"، بقولها: "طيب بعد ٢٤ ساعه مش فاهمه حاجه، احساس الخضه و الرعب ربنا ما يكتبه على حد.. الحمد الله اننا بخير ومليون سيناريو فى دماغى من امبارح ! لو مامى كانت لوحدها! لو شهد كانت جوه ! لو احمد كان لوحده! لو كلنا كنا موجودين! و أقول الحمدالله".

وأضافت: "اللغز اللى مش عارفين نحله لحد دلوقتى هو خرج و دخل منين!! مافيش أثر لحاجه مكسوره! والباب كان متشنكل من جوه، و هو اللى عامل كده! طلع منين!! ماعرفش و ده المرعب أكتر!!! طبعا النجده مش بترد و بعد محاولات للوصول لحد فى الشرطه يجى يشوفنا!جه أمين الشرطه بص كده و قلناله ان لينا جار عنده كاميرا ، طلب نشوفها".

وتابعت: "وفعلا كان فيه مشتبه به و الست جارتنا بكل براءه و صدق و أمل قالت" الحمد الله ، برده ساعة أحداث الكتدرائيه جابو الفاعل من الكاميرا" أمين الشرطه بكل ثبات انفعالى " لأ ده كان حدث مهم "!!! :) و امبارح كان الخميس بليل فماكنش ينفع حد يرفع بصمات، و الجمعه أجازه فهيجوا بكره ان شاء الله"

ووصفت شعورها، بقولها: "احنا مش عارفين ننام .. أنا قعدت أهزر مع شهد و أنا مرعوبه من جوايا و مصدومه من فكرة ان فى ناس انتهكوا خصوصيتى للدرجه دى! و بالسهوله دى ! رغم كل الاحطياطات الواجبه اللى عملنها ! البيت مقلوب و الدواليب على الارض !".

واختتمت كلامها بقولها: "بس فى عز كل ده! مامى صرخت و عيطت و بتتكلم مع ضابط فى التليفون قالتله "كل حاجه ! كل حاجه يا فندم ! حتى الصور ال pictures اه والله ! اتقلبنا يا جماعه!.. خلو بالكوا من نفسكوا عشان الحق مابقاش يرجع .. خلصانه بندامه و قهره و زعل!.. مواطنه مصريه عايشه فى مصر".