جولولي | سلاف فواخرجي تكشف تفاصيل اللحظات الأخيرة لوفاة شقيقتها بين أيديها.. صور
  • كمال الشناوي
  • مايا دياب
  • يونس شلبي
  • شمس البارودي
  • رشدي أباظة
  • كيم كاردشيان
  • أوزجي جوريل
  • مونيكا بيلوتشي
  • ريهام حجاج
  • ريم مصطفى
  • ياسمين صبري
  • محمود عبد العزيز

القاهرة - آية عبد العزيز

أحيت الفنانة السورية سلاف فواخرجي ذكرى ميلاد شقيقتها نهى الأول بعد وفاتها نوفمبر الماضي عن عمر يناهز 48 عاماً.

نهى شقيقة سلاف الراحلة

سلاف أعربت عن اشتياقها لشقيقتها الراحلة بمنشور مؤثر كشفت فيه عن معاناة شقيقتها مع المرض و تفاصيل اللحظات الأخيرة قبل وفاة «نهى» بين أيديها، وذلك تعليقاً على صورة تم التقاطها للشقيقتين في عيد ميلاد الراحلة الأخير قبل وفاتها.


النجمة السورية كتبت: «متل اليوم السنة الماضية مانمت بالليل وسافرت وش الصبح عاللادقية لعيدك بعيد ميلادك ، ميلادك وميلادي اللي كنا نعتبرهم انت وانا ايام مقدسة بشهر تموز العظيم وكنا نقعد نحكي عن ميزاتنا الرائعة وعن برج الاسد ، مع انه لا انت ولا انا منفهم بالابراج ، المهم نمدح حالنا ونذكر بعض بمآثرنا ... ونضحك...
كنت متل القمر متل عادتك ، وقوية رغم ضعفك وعم تضحكي رغم حزنك متل عادتك كمان ...
كان صرلك زمان ماعم تاكلي ، بس لانو انا اجيت وبتعرفيني بحب الفطور ماخجلتيني وفطرنا سوا ...
ضميتك وبوستك وحطيت ايدي ع وجهك وانت عم تقليلي هالحبتين اللي طلعولي أثروا على جمالي ... قلتلك بكرة بيروحوا ...
وفعلا راحوا ...
لما انت رحتي بين ايدي راحوا ...
كمان يوم اللي رحتي كنتي قمر وماتغيرتي عليي ، الشي الوحيد اللي كان مختلف هو عيونك اللي عم تدمع مع الضحكة وعم تطلع فيني وتقلي بدون حكي انقذيني ... وقلبي عم يتقطع وانا ماعم اقدر اعمل شي ...
حضروني الاطبا نفسيا قبل فترة للخبر وقبل اسبوع وقبل يومين ، وبدا العد التنازلي لألمك والعد التصاعدي لوجعي ...
وقبل اليومين مايخلصوا ، اجيت بدي روح عالبيت جنب المشفى شي ساعة وارجع ، في شي خلاني ماروح ، ماقدرت ، اشتقتلك ... فجأة اشتقتلك ... مع اني كنت جنبك ...
قربت لعندك وضميتك كتير ، سقيتك آخر شفة مي ، ورحت شعلت بخور من دير صيدنايا كان باعتلي ياه رفيقي سعيد خصوصي مشانك بعرفك بتحبيه ، وكنت عم استنى لتفيقي لقلك شو وصلني من الدير وبعرف قديش رح تفرحي وتتفائلي واعطيكي المنديل اللي عليه العدرا اللي ماكنتي ترتاحي الا لما تشوفيها واللي بقيت مرافقتك ورفيقتك ...
بس ، مافقتي ...
لمست وجهك اللي بحبه نفس اللمسة تبع يوم ميلادك ومسحته بزيت الدير ، ومسحت عيونك ورقبتك وجبينك وشعراتك ، وعلى قد ماكنتي حلوة صرتي احلى ...
ووشوشتك وقلتلك راحوا الحبتين اللي مدايقينك ، واطمني مارح خلي حدا يشوفك الا بأحلى صورة متل ما انتي بتحبي يا أجمل بنت باللادقية كلها ...
قلتلك بحبك قمتي ضحكتي ولمعت دمعة بطرف عينك ، كانت اخر دمعة ... وشديتي ع ايديي ... وكانت اخر شدة ...
يومها كان آخر كل شي ... بس انت دايما عندي أول شي ... وبعرف اني بقلبك اول شي ...
كل عيد ميلاد وانت أقرب مني إلي ...
و اشتقتلك ... كتير اشتقتلك ...
الله يرحمك نهى ... أختي».

يُذكر أن نهى هي الأخت غير الشقيقة لفواخرجي من أمهما ابتسام أديب التي تزوجت من يوسف معلا، وأنجبت منه الراحلة وعمّار والرحلة منى، قبل أن تتزوج من محمد فواخرجي، وتنجب منه أشرف وسلاف فواخرجي.

 

 



عدد التعليقات (0)

الاسم (مطلوب):

ما هو مجموع 3 + 7

السيرة الذاتية:

أخبار الرئيسية: