عجوز ترشح حمدين صباحي رئيساً لمصر لأنه «من ريحة الحبايب»

«لأنه من ريحة الحبايب»..قررت الحاجة خضرة بيومي تحرير توكيل للمرشح المحتمل لرئاسة الجمهورية حمدين صباحي، لقناعتها بأنه الأفضل لمصر..فقط لأنه من «ريحة» الرئيس المصري الراحل جمال عبدالناصر.

الحاجة خضرة بررت تأييدها لصباحي رئيساً لمصر قائلة: «أنا مواليد ٥/٧/١٩٣١، وعشت أيام جمال عبدالناصر وشفت الخير اللى جه على إيديه للبلد، وبعد ما مات راح الخير معاه، ولما سمعت الأستاذ حمدين بيتكلم حسيت إنه من ريحة عبدالناصر، وإنه الوحيد اللي كل ما يتكلم يقول هانرجع عهد عبدالناصر».

خضرة التي تتعدى الـ81 عاماً تابعت متحدثه عن رئيس حزب الكرامة السابق: «دعيت ربنا إنه يبقى رئيس الجمهورية، ولما قالولى إنه محتاج توكيلات عشان يترشح قلت للولاد لازم نروح نعمله التوكيل زى ما عمل آباءنا توكيلات لسعد زغلول»، وأضافت: «يارب الأستاذ حمدين ينجح ويبقى رئيس ويرجع الخير للبلد».