كيف نعى أطفال الفن ضحايا أسيوط؟
لم يمر حادث ضحايا أطفال أسيوط مرور الكرام على المصريين فكان صدمة كبيرة دهست قلوب المصريين، وبرهنت على الإهمال بدأ يزهق الأرواح في غفلة.
استنكر نجوم الفن من الأطفال الحادث، وعبروا عن مشاعرهم الغاضبة ببراءة متناهية ، فمهنم من ألقى باللوم على عامل المزلقان باعتباره المتسبب الأول والأخير عن الحادث، ومنهم من اتهم الحكومة بقتل الأطفال قصداً.
فقالت الطفلة جنا :« مش عارفة أقول إيه، أنا شفت الصور في التلفزيون وقعدت أعيط ، صحيح أنا ما أعرفهمش بس هما برضه صغيرين زيي ولسة بيروحوا المدرسة».
وتابعت قولها :«الراجل بتاع المزلقان كان لازم يعمل صفارة جامدة علشان سواق القطر يسمع، لكن الكلام دلوقتي للأسف مش هيرجعهم تاني، وفلوس إيه اللي الحكومة هتدفعها لأهالي الأطفال أكيد الأهالي عايزين يدفعوا كل الفلوس اللى معاهم علشان العيال ترجع تاني».
أما الطفلة منة عرفة فقالت :« أنا مكتئبة جداً، لكن ماما أقنعتني إن مافيش حاجة نعملها غير إننا ندعي ليهم ربنا يرحمهم، وربنا يجازي اللي كان السبب، وللأسف زعلت أكثر بالليل عندما احتفل جمهور الأهلي بالفوز اللي حققه، وبقولهم إن دم الأطفال مش رخيص للدرجة دي».
أما الطفل محمود الشهير بـ أوشة فاتخذ موقفاً أكثر حده قائلاً :«والله المسئول عن الحادثة دي عايز الحرق؛ لأنه غبي ومش عارف إن نومه وكسله وإهماله هيودي الأطفال في حته تانية خالص غير المدرسة، يمكن استسهل الشغلانه، وقال إيه يعني أنام مفيش حاجة هتحصل، وأكيد رئيسة بردوا مهمل».
وتابع أوشة:« أنا عارف إن الدولة مافيهاش فلوس بس لازم المسئولين يبدأوا يفتشوا، ويشوفوا العمال ناقصهم إيه، علشان يرحمونا من المناظر اللي بنشوفها دي ».
وهناك الطفل سولي الذي شارك في مسلسل « مع سبق الإصرار » في رمضان الماضي فقال هو الأخر :« أنا رفضت أكل الساندويتش وماكنتش عايز أروح المدرسة تاني ، ولكن ماما قعدت معايا وفهتني إننا مالناش ذنب علشان نعيط، أنا بذاكر في المدرسة إن الشهيد هو اللى بيموت وهو بيحارب مع اسرائيل لكن دلوقتي بلاقي أطفال بتموت وهي رايحة المدرسة أو بتشجع في ماتش كورة ».
