شعبان عبدالرحيم لـGololy: «هي الكحكة في إيد اليتيم عجبة»؟!
مطرب شعبي حقق نجاحا كبيرا رغم سيره على وتيرة واحدة لم يغيرها منذ صعوده ورغم ثقافته السياسية القليلة إلا أنه يعلن دائما عن مواقف سياسية سواء في أغانيه أو حواراته الصحفية ولقاءاته التليفزيونية.
"شعبان عبد الرحيم مر بأزمة صحية مؤخرًا أثير حولها الشائعات ويدخل عالم الدراما لأول مرة من خلال مسلسل "اثنين على الهوا" والمقرر عرضه في رمضان القادم.
كيف تبدو حالته الصحية الآن ولماذا لجأ للإعلانات التليفزيونية وغيرها من الأسئلة أجابنا عنها شعبان في هذا الحوار الخاص.
شعبان عبدالرحيم بدأ حديثه لـGololy فقال: " الحمد لله أنا بقيت كويس يعنى شوية ربو وضيق نفس وكشفت وأخذت العلاج وأنا زى الفل بس الإشاعات مش سيباني في حالي وكل يوم باسم كلام كتير عن صحتي منها إني بشرب مخدرات وهى اللى عملت فيا كده وده مش صح بس أنا مش زعلان من الكلام ده لأن أي حد مشهور بيطلع عليه كلام كتير وآخر كلام كان إشاعة وفاتي حتى الناس بتتصل تسأل عليا وفيه ناس بتعدى عليا في البيت وبتسأل عنى في المقلة - مقلة التسالى - بس رغم كده زعلت وفرحت في وقت واحد.
ويضيف: زعلت لما قالوا عنى إنى تعبت من المخدرات وفرحت لما شفت الناس يتطمن عليا وقلقانين لما كنت تعبان وشفت عنيهم زعلانة عليا قوى وفرحت أكثر من التليفونات اللى حبت تطمن عليا لما سمعوا خبر موتي.
شعبان عبدالرحيم أجاب باندهاش عند سؤاله عن سبب دخوله مجال الإعلانات وقال: "عادى هي الإعلانات عيب مفيهاش حاجة يعنى إني أعمل كام إعلان كده وهو كله فن وبعدين ناس كتير بدأت بالإعلانات من نجوم السينما اللى إحنا شايفينهم يعنى هى جت عليا وطالما مش بقدم حاجة وحشة مش ضد حد ولا بتخالف الأخلاق والدين يبقى محدش ليه عندي حاجة.
ولكنك تقوم بالإعلان عن أحد المنتجات الجنسية؟ سأل Gololy فأجاب: " أيوة صحيح لكن المنتج ده مش داخل جداول ممنوعة ومصرح بيه من وزارة الصحة وموجود عادى في الصيدليات وبعدين المشاكل الجنسية موجودة سواء كانت مرض جسمي أو نفسي المهم إنها مشكلة طبية والناس كلها عارفة كده يبقى ليه نعمل نفسنا مش واخدين بالنا طالما ربنا خلق الطب والدوا ودا منتج طبيعي لاعيب ولا حرام بس يظهر إن أي حاجة يعملها " شعبان" الناس هتتكلم عليها باختصار " الكحكة في ايد اليتيم عجبة " طيب أنا عملت إعلان عن " شاي " يمكن بعد كده حد يطلع يقول إن الشاي مكيفات وإن شعبان بيعمل إعلان عن مكيفات حرام.
أما عن مدى تأكده من تراخيص المنتج فقال متأكدتش بنفسى بس الناس اللى معايا طمنونى إن الحاجات دى كويسة وإن المنتج معروف في السوق من قبل ما أعمل الإعلان وخلينا نكون صرحا مع بعض فيه ناس كثير بتعانى مشاكل زوجية إيه المشكلة لما أساهم في حل المشكلة وباحلف بالله إن الفلوس بتاعة الإعلانات مش هدفى بس لكن هدفي أعمل حاجة دمها خفيف ومفيدة للناس وزى ما قلت لا هي عيب ولا حرام.
وعن مسلسله الجديد كشف شعبان عبدالرحيم عن بعض تفاصيله وقال: الناس اللى أنتجوا المسلسل كلموني وقالولى أعمل معاهم المسلسل ودوري رجل أعمال يبدأ من الصفر ولما يبقى غنى الكلام يكتر عليه ويقولوا جاب الفلوس دى منين ويبدوا يتكلموا عليه في الفضائيات وعلشان كده هوه بيعمل نفس الحكاية وبيحاربهم في الفضائيات ويشاركني البطولة " فتحى سعد" ومحمد الحفناوى " ومجموعة من الشباب والمطرب " حسام حسنى" والمسلسل فيه أغاني كتير ليا ولغيري من الشباب ودى أول تجربة ليا في الدراما يارب تعجب الناس لأن المسلسل خفيف علشان بكسر الملل اللى السياسة عملاه فى الناس.
شعبان ظهر ككومبارس لأغنية "بحب النسوان " التي يغنيها ابنه عصام وعن السبب الذي دفعه لذلك قال: "كلمات الأغنية دمها خفيف لأن عصام بيقول الأول " بحب النسوان" ويسكت وهنا ادخل أنا أضربه بالقلم فيبدأ في تكملة الأغنية النسوان المحجبة المحترمة اللي بتسمع كلام جوزها فكان ظهوري مطلوب ودمه خفيف وبعدين إن مكنتش أظهر علشان عصام أظهر علشان مين وبعدين زى ما قلت البلد عايزة حاجات دمها خفيف كفاية ملل برامج التوك شو والسياسة.
وبمناسبة السياسة يختتم شعبان حديثه لـGololy قائلاً: البلد حالها يصعب على الكافر بصراحة أنا شايف إن كل الأحزاب والناس اللى انت شايفهم دول بيعملوا علشان مصلحتهم وهنعمل انتخابات مجلس شعب تانى علشان ينحل تانى وبرضه الإخوان هيكسبوا يعنى مفيش حاجة اتغيرت طيب المجلس اللي فات اتحل علشان كان غير قانوني وده كان هيبقى كده لولا حكم المحكمة الإدارية يعنى ننفس الغلط كنا هنغلطه وشوية الرئيس يقول كلام ويرجع فيه وشوية الأحزاب تزعل منه وهو يزعل منهم ومحدش فاهم حاجة والشعب هو اللى خسر حتى الناس دلوقتى بيقولوا ولا يوم من أيام حسنى مبارك صحيح إن الكلام ده غلط بس الناس زهقت من الدم والنار والقرف اللى عايشين فيه من بعد الثورة.
