جابر القرموطي لرئيس الجمهورية: مش عايزين حارة مزنوقة تاني

استنكر الإعلامي المصري جابر القرموطي إصدار مؤسسة الرئاسة قانون بتحصين قرارات اللجنة العليا للانتخابات الرئاسية، مشيرا إلى أن هذا القانون يخالف المادة 97 من الدستور، والتي تحظر تحصين أي قرارات إدارية من الطعن عليها أمام القضاء.

جابر قال: «لأ يا مؤسسة الرئاسة، اللي بيحصن اللجنة العليا للانتخابات هو العدل، اللي بيحصن قرارات رئيس الجمهورية هو المواطن، ليه حضرتك تحصنها بلوي الدراع؟!، وكأنك بتقولنا هو كده واخبطوا دماغكم في الحيط، انت إزاي هتكون ماشي عدل والشعب هيقولك إنت مش ماشي عدل؟!، لكن يبقى أول اختراق للدستور يكون من مؤسسة الرئاسة التي يرأسها قاضي جليل هو المستشار عدلي منصور؟!».

وأضاف –في برنامجه «مانشيت» على قناة «ON TV»-: «وبعد ما اخدتوا رأي مجلس الدولة وقالكوا إن القانون ده ما ينفعش، رجعتوا قولتوا ده رأيهم استشاري، طب بتاخدوا رأيهم من الأول ليه؟!، وأناشد رئيس الجمهورية المستشار عدلي منصور إنك ما تديش مساحة لحد إنه يلعب، مش عايزين حارة مزنوقة تاني».