محمود سعد: ارحموا باسم يوسف

استنكر الإعلامي المصري محمود سعد استمرار الهجوم على الإعلامي الساخر باسم يوسف، بعد اعتذاره عن اقتباسه مقاله الأخير في جريدة «الشروق».

سعد قال –في برنامجه «آخر النهار» على قناة «النهار»-: «إحنا حبينا باسم يوسف حب رائع ومازلنا نكن له هذا الحب، باسم عمل حاجة غلط ليه على طول المقابل الدبح؟!، البعض متحفز بشكل مش منطقي ومش مبرر، الرجل عمل حاجة غلط واعتذر على تويتر وفي الجورنال وفي البرنامج، مين فينا مبيغلطش؟!، ما إحنا طول ما بنشتغل بنغلط، وبنقول معلومات أحيانا تطلع غلط، وبنقول آراء أحيانا تطلع غلط».

وأضاف: «نغفر لبعض يا جماعة، مش نبقى قاعدين بالسواطير لبعض، هو اعتذر إيه المطلوب بقى؟!، إحنا عايزين نبقى رحماء ببعض، ده المصريين مفيش أجمل منهم، مش إحنا بتوع صافي يا لبن حليب يا قشطة، اللي مبيغلطش يروح يقتل باسم يوسف، طب هو غلط نروح نعدمه في ميدان التحرير؟، ولا نقوله صافي يا لبن حليب يا قشطة ونحتفظ بنجم ساخر جميل مش بيتكرر كتير، اللي بيعمله باسم ده جديد على التليفزيون المصري والعربي».