نوارة نجم: محلب مش عارف يحل مشاكله طلعه على هيفاء وهبي

استنكرت الكاتبة الصحفية والناشطة السياسية نوارة نجم قرار رئيس الوزراء، إبراهيم محلب، بمنع عرض فيلم «حلاوة روح» بطولة الفنانة هيفاء وهبي، مشيرة إلى أنها تعاطفت مع هيفاء والسبكي بعد هذا القرار بالرغم من أنها لم تكن تنوي دخول الفيلم.

نوارة قالت: «ليه محلب بيمنع فيلم؟ ما كده كده الكهربا حتقطع في السينما.. هو انت مش عارف تحل مشاكلك بتطلعه على هيفاء وهبي؟.. وهي من امتى الافلام المصري بتعلم الاخلاق؟ زي ايه مثلا؟».

وأضافت: «زي أفلام سمير صبري بتاعة محتار أنا ويا البنات؟.. وفيلم نهر الحب ده بقى أخلاق عشان فاتن حمامة بتمثله؟ ده قصة واحدة بتخون جوزها عشان جاب لهاني شطرنج.. وفيلم غزل البنات قصة بت صايعة فاشلة بتتمرقع على المدرس بتاعها ورايحة تقابل صاحبها في بار وهي خارجة علقت الواد اللي وصلها».

وتابعت: «مافيش الا حسين صدقي هو اللي كان بيعمل افلام تعليمية وعشان كده ماحدش كان بيتفرج عليه.. حتى افلام شادية كلها لازم في نص الفيلم تقول لحبيبها: انا حامل والقصة كلها تدور حوالين حملها.. رئيس الوزرا حيمنع الافلام دي كلها؟.. يعني ينفع كده يخلي الواحد يتعاطف مع هيفاء وهبي والسبكي؟ والمصحف ما كنت حادخله ولا أشوفه لو ما كانش اتمنع».