خيري رمضان: أنا كاتب وصيتي من زمان.. والمغير كبيره يتضرب على قفاه

شن الإعلامي المصري خيري رمضان هجوما حادا على أحمد المغير، المنتمي لجماعة الإخوان المسلمين، وذلك بعد أن هدده الأخير بقوله: «استمتع بأخر أيامك في الحياة».

خيري قال –في برنامجه «ممكن» على قناة «CBC»-: «المغير هو الوجه القبيح الحقيقي للإخوان، وأنا أشدت به لأنه به ميزة مش موجودة عند كتير من الإخوان، وهي إنه متسق مع نفسه وبيقول اللي بيدور في الجلسات الخاصة، جايز لأنه طفل قلبوظة، وكان بيتقال عليه طفل خيرت الشاطر المدلل».

وأضاف: «يا حبيبي أنا لما حاربت حاربت وأنا هنا، وعلى رأس النظام ده كان رئيس الجمهورية بتاعك، ومخوفتش وهربت زيك يا نوغة وانت بتجري في الحواري والشوارع علشان تهرب وأكيد لبست نقاب، انت نسيت العلق اللي كنت بتاخدها انت مروحتش حتى إلا واتضربت».

وتابع: «أوعى تفتكر إني ممكن أخاف من تهديدك أنا أو زملائي، إحنا ما بنخافش يا حبيبي، إحنا مؤمنين إننا على صواب، وإيماننا جاي من البلد دي، فأنا مش هخاف من الموت لأن عمري وقدري مكتوب بيومه، ومن زمان كاتب وصيتي، ووصيتي إن مفيش عيل من عيالي يطلع زيك إرهابي، أنا مبخافش يا مغير لا من تفجير ولا من إرهاب ولا من إخوان، أنا بخاف من ربنا علشان كده مش فارق معايا حد».

وقال: «ياللي بتقولنا انتوا عبيد العسكر، أنا خدمت في هذا الجيش، وكنت سعيد إني عسكري في الجيش المصري، انت متعرفش الجيش المصري لأنك عندك التصاق مينفعش تدخل الجيش، انت يدوبك بتضرب على قفاك، وبتناضل على الفيس بوك».