ريهام سعيد: أنا كنت مؤدبة جداً مع الملحدة

أبدت الإعلامية المصرية ريهام سعيد تعجبها الشديد من الانتقادات التي وجهت لها، بعد طردها الملحدة «نهى»، التي استضافتها أول أمس، في برنامجها «صبايا الخير» على قناة «النهار».

ريهام قالت: «في ناس بتعلق إنه عيب إني أقولها اطلعي بره، انتوا بتتكلموا بجد؟!، أنا عيب أني قولتلها اطلعي برة؟!، يعني لما تقول مفيش رسول الله، وأنه مجرد إنسان عادي عبقري ألف القرآن الكريم، وأن الأديان كلها أساطير، أنا اللي عيب؟!».

وأضافت إنها مع كل هذا احتفظت بمهنيتها، وبحدود اللياقة والأدب، وقالت: «لغاية ما قولتلها كل اللي انتي بتقوليه ده بيتسم بالجهل، قالتلي انتي اللي جاهلة، وأنا مرضيتش أرد عليها بشتيمة، ولما قالتلي لو هتقلي أدبك أنا هقوم أمشي، اللفظ اللي كان المفروض يطلع مني حاجة تانية خالص، بس أنا كنت مؤدبة علشانكوا وقولتلها اطلعي برة، مكنتش اعرف إن دي كلمة عيب بعد كل ده».

وأكدت أن الملحدة استفزتها إلى أقصى درجة، قائلة: «سبحان من بيصبر الواحد إنه ميقومش يعمل حاجات تانية، أنا شايفة إني كنت مؤدبة أوي، وأنا آسفة جدا للي مش عاجبه إني قولتها اطلعي بره، ميعجبكش ومش مهم يعجبك، لأن ده أقل تصرف كان ممكن الواحد يعمله».