أكرم حسني: أنا مختلف مع «أبوحفيظة»
بعد أن قام الإعلامي أكرم حسني بتصوير بطاقته الانتخابية أمس، والتي أوضحت تصويته لصالح المرشح الرئاسي، المشير عبد الفتاح السيسي، أبدى متابعيه تعجبهم الشديد من انتخابه المشير رغم انتقاده له بشدة في برنامجه «أسعد الله مساءكم من جديد» على قناة «MBC مصر».
حسني وجه رسالة لجمهوره، على حسابه على موقع «الفيس بوك»، لتوضيح الأمر، حيث قال: «في فرق كبير جدا بين رأيي الشخصي في أي حاجة و بين محتوي فني باقدمه في برنامجي من خلال شخصية أبو حفيظة لان رأيي الشخصي ده يخصني أنا و بس إنما المحتوي الفني اللي بيوصل للناس في بيوتها لازم يكون محايد و ينقل الصورة من ارض الواقع لشاشة التلفزيون.. الناس اللي بتسألني أنت ازاي أديت صوتك للمشير السيسي وبتنتقده في برنامجك.. خلوني أرد علي النقطة دي بشيء من التفصيل».
وأضاف: «أولا: مش منطقي أبدا أكون باعمل برنامج بيغطي الانتخابات الرئاسية وأتغاضي عن أي طرف من أطراف المعادلة سواء كان الأستاذ حمدين صباحي أو المشير السيسي.. أي انتقادات بيوجهها المواطن البسيط في الشارع لازم أنا انقلها للشاشة و إلا يبقي ايه لزمتنا!! كلمة إعلام معناها أن تعلم الناس بالحقيقة و لو معملتش كده أكون خالفت ضميري الإنساني قبل المهني.. ثانيا: لازم نعيد النظر في فكرة تأليه الأشخاص و جعلهم فوق مستوي الانتقاد.. مش ممكن يا جماعة شعب قام بثورتين و نادي بالحرية و الديمقراطية مش قادر يتقبل أي انتقاد للشخص اللي بيحبه وإلا يبقي إحنا بنصنع فرعون من أول وجديد».
وتابع: «ثالثا: و دي أهم نقطة في الموضوع.. في فرق بين إني انتقد شخص و بين إني أهينه.. اتحدي حد يقدر يطلعلي مشهد واحد من البرنامج بيهين أي حد من الاتنين المرشحين.. كل اللي بتناوله في البرنامج هو من ارض الواقع و باتناوله في إطار الاحترام و عدم الخروج عن اللياقة.. وأخيرا.. اقدر جدا الأستاذ حمدين صباحي و لكن من وجهة نظري الشخصية المتواضعة المشير السيسي هو الأجدر لإدارة البلد في المرحلة الصعبة دي و ربنا يعينه.. و هافضل انتقده بأدب لمصلحة مصر و مصلحته الشخصية».
