وصية صباح وتفاصيل اللحظات الأخيرة في حياتها.. صور

استيقظ العالم على فاجعة وفاة النجمة اللبنانية صباح اليوم الموافق 26 نوفمبر، عن عمر يناهز 87 عاماً.

وفي أول تصريح من أسرتها، كشفت كلودا ابنة شقيقة الراحلة عن تفاصيل اللحظات الأخيرة في حياة الشحرورة، وكذلك وصيتها قبل الوفاة، عبر منشور لها عبر صفحة الراحلة الرسمية على موقع فيس بوك، حيث كتبت: «يا احباب الصبوحة

الصبوحة اليوم راجعة على ضيعتا عالأرض اللي حبّتا وحبّتا

الصبوحة اليوم راحت عالسما عند الرب الكبير راحت عند اهلا واخوتا اللي اشتاقتلن كتير

صباح الحياة صباح الفرح صباح الابتسامة المشرقة دايما صباح الضحكة المرسومة باصعب الاوقات

بتودعكن وبتقلكن ما تبكو وما تزعلوا عليي وهيدي وصيتي الكن

قالتلي قوليلن يحطو دبكة ويرقصوا بدي ياه يوم فرح مش يوم حزن

بدي ياهن دايما فرحانين بوجودي وبرحيلي متل ما كنت دايما فرّحن

وقالتلي قلكن انه بتحبكن كتير وانو ضلوا تذكروها وحبوها دايماً

يا احباب الصبوحة

الصبوحة ما عادت موجودة معنا بجسدا في هاللحظة

الساعة 3 فجر اليوم طلعت روحا الى الخالق وهي نايمة

حتى في رحيلها كانت هنية ومتل النسمة وما زعجت حدا ولا تعبت حدا

الصبوحة رحلت بالجسد بس رح تضل موجودة بقلوبنا الى الابد

رح نشتقلك كتير كتير كتير يا حبيبتنا

يا ريت كان بايدنا نعطيكي كل لحظة من عمرنا ونخليكي معنا اكتر واكتر

بس هاي ارادة ربنا ..

منحبك صبوحة منحبك للأبد وما رح ننساكي ابداً ابداً

الله يرحمك يا صبوحة ويغفرلك وتكون نفسك بالسما مع الابرار والقديسين».

عدد كبير من نجوم الوطن العربي أعربوا عن حزنهم العميق على رحيل شحرورة العالم العربي، وتنافسوا في وضع صورها عبر حساباتهم الشخصية عبر مواقع التواصل الاجتماعي، مرفقة بكلمات مؤثرة عبروا فيها عن خسارتهم الفنية الكبيرة لواحدة من أبرز نجوم زمن الفن الجميل.