تفاصيل آخر مكالمة بين فاتن حمامة وعمر الشريف

رغم سنوات الحب الطويلة التي جمعتهما واشتياقه لها لم يجرؤ الفنان المصري عمر الشريف على الاتصال بالفنانة فاتن حمامة منذ انفصاله عنها في أواخر السبعينات، كان يطمئن عليها من ابنه طارق، حتى حدث الاتصال الأخير منذ شهور.

المؤلف المصري محمد دياب قص على صفحته الشخصية عبر موقع «فيس بوك» رواية قالها له صديق مقرب له كان يصور آخر فيلم قصير لعمر الشريف في لندن منذ شهور قليلة.

دياب كتب على صفحته: «صاحبي حكالي أن أكتر حاجه كانت ممتعة في المشروع أنه شاف عمر الشريف عن قرب، حاجات كتير حكالي عنها و كانت كلها بالنسبالي مبهره -طبعاً أنا واحد من مجاذيبه- بس أكتر حاجه كنت فاكرها إشاعة أو مبالغه هو كلامه عن فاتن حمامة».

دياب استطرد قائلًا: «صديقي بيقولي أن بين كل جملة وجملة عمر الشريف لازم يجيب سيرة فاتن حمامة و أنه لسه ندمان علي أنهم سابوا بعض. راجل في التمانينات و بالمعني الحرفي للجملة عرف أجمل ستات العالم وعمره ما قدر ينسي حبه الوحيد! بصراحة كنت فاكر دى قصة مراهقين و المبالغة غالبة عليها مع أني سمعت الموضوع ميت مرة، بس أتفاجأت بأن الواقع ساعات بيبقي كليشيه و ميلو درامي أكتر من الخيال».

المؤلف المصري أضاف: «لأسباب ميعرفهاش صديقي و مسألش عنها عمر الشريف طلع مكلمش فاتن حمامه من عشرين سنه! بعد يوم من أيام التصوير عمر الشريف خد صديقي يعرفه علي دكتور صديق قديم لعمر الشريف في لندن، علي العشاء كالعادة جت سيره فاتن حمامة، الدكتور اللي طلع صديق مشترك بين فاتن حمامه و عمر الشريف قاله يا عمر أنا معايا نمره فاتن أيه رأيك تكلمها!؟

عمر الشريف تنح لثواني و فجأة كل الأسباب اللي منعته عشرين سنه أسقطها من حساباته، الدكتور طلبلهاله … عمر الشريف خد التليفون وكلمها».

دياب أضاف: «أزيك يا فاتن؟ عمر الشريف قالها كده و خد التليفون بعيد. صديقي مسمعش باقي المكالمة، بس بيوصف أن عمر الشريف كان متأثر قوي وهو بيكلمها شاف في عينه وحركه جسمه توليفة من كل المشاعر الإنسانية … صديقي كان فخور بعد ما خلص الفيلم أنه أشتغل مع عمر الشريف، بس كان فخور أكتر بكتير أنه شهد لحظه تاريخيه زى دى، الحمد لله أنهم كلموا بعض قبل ما كانت الفرصة تروح، الله يرحم فاتن حمامه و يصبر كل اللي حبوها … و بالذات أكتر واحد حبها».

يُذكر أن فاتن كانت متزوجة من المخرج عز الدين ذو الفقار في الخمسينات وأنجبت منه ابنتها نادية ولكنها وقعت في حب عمر الشريف بعد رؤيته وانفصلت عن عز الدين وتزوجت منه، ولكن ربما حالت أحلام عمر الشريف في تحقيق العالمية دون استمرار هذا الزواج، فانفصل الثنائي ولكن ظل اسم عمر الشريف مرتبط بفاتن حمامة مع مرور السنوات وعبر الفنان عن ندمه لحدوث هذا الانفصال.

فاتن حمامة رحلت يوم السبت 17 من شهر يناير عن عمر يناهز 84 عامًا.