سر تعرفه لأول مرة عن أنف هند صبري في فيلم «أسماء».. فيديو

كشف المخرج المصري عمرو سلامة، مخرج فيلم «أسماء»، أن أنف الفنانة التونسية هند صبري، التي ظهرت بها في هذا الفيلم، لم تكن طبيعية.

سلامة قال: «في فيلم أسماء، كنت مصمم على إني أغير شكل الفنانة هند صبري اللي قامت بدور أسماء، الفيلم كان مستوحى من قصة سيدة حقيقية، وكانت الفكرة إني عايز أخلي الفيلم واقعي وحقيقي على قدر الإمكان، وعلشان كده كنت عايز أنسي الناس شوية إن ديه هند صبري اللي هم عارفينها».

وأضاف: «كنت عايز من هندي صبري موهبتها الخارقة في التمثيل، من غير شكلها المعروف للجميع، وعلى هذا الأساس أصريت نجيب واحدة من أفضل خبراء المكياج في العالم، إسمها Jo Allen، هي اللي عملت أفلام زي Gladiator، وهي اللي غيرت شكل نيكول كيدمان في فيلم The Hours  وغيرت شكل هابيير بارديم في فيلم Mar Adentro».

وتابع: «طلبت منها نغير مناخير هند زي ما غيرت قبل كده مناخير نيكول كيدمان، وعملت كده فعلا، لكن الحقيقة إن تقريبا ماحدش خالص في الكوكب خد باله.. هند كانت بتقعد كل يوم قبل التصوير كذا ساعة علشان تعمل مكياج يخليها أكبر في السن وتحط المناخير.. طبعا لما ماحدش خد باله في الآخر، هند صبري ومحمد حفظي بالذات كانوا مش طايقني، طبعا مع اللوكيشن كله اللي كان قاعد مستني المناخير».

ثم وجه اعتذارا لهند ولفريق عمل الفيلم بقوله: «وأنا بستغل هذه الفرصة السعيدة علشان أشكرهم، وأعتذرلهم نص الاعتذار، لأن غرضي كان شريف والمناخير هي اللي طلعت نص كم».

وقام بنشر فيديو للفنانة التونسية، وهي تقوم بخلع المناخير الصناعية في كواليس الفيلم، وسط ضحكات الجميع.