ريم أحمد توضح حقيقة فيديو الرقص

تلقت الفنانة المصرية الشابة ريم أحمد، والتي اشتهرت بدور «هدى» ابنة ونيس الصغرى، هجوما حادا بعد انتشار مقطع فيديو لها وهي ترقص بطريقة جنونية على أغاني المهرجانات.

الفنانة المصرية عبرت عن استيائها الشديد من هذه الانتقادات، ودافعت عن نفسها بتأكيدها على أن الفيديو تم تصويره، دون علمها، من حفل للسيدات فقط، ضمن فعاليات التوعية بمرض سرطان الثدي.

ريم قالت: «1- انا مدربه زومبا اللى مايعرفش ايه هى الزومبا هى مجموعه من انواع الرقص و الفيتنس اللى على مستوى العالم كله (صلصه-مارينجى-ريجاتون- فلامنكو- هيب هوب ) واى نوع من انواع رقص الشعوب! والزومبا قائمه على اداء مجموعه من الحركات تساعد على التخسيس».

«2- الفيديو نازل من ايفينت لدعم وتوعية عن مرضى السرطان تحت رعاية مستشفى بهيه بتظيم الجامعة الأمريكية وكان سيدات فقط بس للأسف الفيديو اتصور من احدى الحاضرات ونزل على الفيس بوك واليوتيوب وتداول بشكل غير لائق تماما».

وعبرت عن حزنها من التعليقات المسيئة للفنان محمد صبحي وكذلك اتهامها بتشويه مسلسل «يوميات ونيس»، حيث قالت: «3- الكومنتات المسيئة ليا ولأستاذ محمد صبحى وان المسلسل باظ وصورته اتشوهت كل ده ليه؟ انا خريجة معهد الباليه والمعهد العالي للفنون المسرحية.. موضوع ادى تربيتك وهى دى هدى وكل الكومنتات دى حقيقى مش فاهمه ايه علاقتها وان اصلا الفيديو ماكنش المفروض يتصور لأنه داخل حفله للسيدات فقط! ».

وتابعت -على حسابها الخاص على موقع «الفيس بوك»-: «4- ازاى بنى ادم يقدر يغلط فى بنى ادم تانى و هو مايعرفهوش على المستوى الانسانى؟ تحكم على حد ليه؟ تحكم ازاى و انت او انتى اصلا ماتعرفهوش!!!.. 5- ايه علاقة ان دى تربية ونيس وان الناس مصدومه؟ كل الناس بتعبر عن سعادتها بالرقص.. حقيقي انا مستاءه من الكومنتات الغير لائقة والخارجة على حاجه اصلا انا ماغلطش فيها ده ايفينت سيدات فقط وأُستغل بشكل خاطئ».

وخاطبت الصحافة بقولها: «هل الصفحات اللى نزلت الفيديو عندهم مهنيه انهم زى ما نزلوا فيديو تحت مضمون خاطئ هينزلوا التوضيح؟! طبعا كل واحد و ضميره ،،، و بشكر كل الناس اللى دافعت عن الموقف و حاولت تصحيحه».