إيناس عز الدين تحتفل بعيد زواجها.. صور

هنأت المطربة الشابة إيناس عز الدين زوجها الفنان أحمد قمر بمناسبة عيد زواجهما الثالث، والذي سيحل بعد 10 أيام.

إيناس نشرت مجموعة من الصور لها مع زوجها عبر «فيس بوك»، ووجهت له رسالة وقالت: « ومافيش غيره بيفرحني.. الوحيد اللي عنده المقدرة إنه يخرجني من أي أزمة نفسية أو جسدية بمر بيها».

الفنانة الشابة قصت على جمهورها كيف تعرفت على زوجها وقالت: « اتعرفت عليه يوم ما دخلت الأوبرا وبقيت مطربة في دار الأوبرا المصرية كان يوم 14/9/2009، كان زميلي واتعرفت عليه زي ما اتعرفت على كل زمايلي بس كان فيه شيء مميز خلاه يبقى صديقي الأوحد ومن اول يوم بقينا اصدقاء كنا فعلا اصدقاء بس بقينا زي اتنين شباب اصحاب نخرج سوا ونتكلم ونفضفض لبعض سوا وفعلا ما كانش فيه بيننا اي حاجة بس كان كل اللي يشوفنا سوا يقولنا انتوا مكتوبين لبعض وكنا نسمع كلامه ونضحك فضلنا كام شهر اصدقاء فعلا بس، انا اللي حبيته الأول وانا اللي فجأة لقيتني بقرب منه لأني شوفت فيه حاجات كتير مش زي اي حد، شوفت فيه الراجل الجدع اللي عمره ما يتكلم على اصحابه، شوفت فيه الشهامة لأنه عمره ما اتكلم كلمة وحشة على خطيبته السابقة ولا حتى عمره حكالي تفاصيل حياتهم او سابوا بعض ليه او ذم فيها وكان دايما يقوللي النصيب وربنا يسعدها».

نجمة أراب أيدول أكملت قائلة: « وفجأة لقيته بيقوللي انا مش عارف استغنى عنك انا عايزك تكوني في حياتي بأي شكل وبأي طريقة انتي عايزاها المهم تفضلي في حياتي وانا قولتله باب بيتي مفتوح زي ما باب قلبي اتفتحلك وفعلا جه واتقدملي ما فكرتش ولا اتناقشت لا في شبكة ولا في مهر ولا كل الكلام ده كان كل هدفي ان الراجل ده يكون هو اللي اكمل عمري معاه، اول ما قررنا نرتبط رسمي كل واحد فينا اتقاله على التاني بلاوي علشان الارتباط ما يكملش كان ردنا على كل اللي بيعملوا كده "دعوات خطوبتنا».