سارة نخلة تهاجم مذيعات «نفسنة» بعد هذا الموقف الغريب معها.. تعرف على التفاصيل

هاجمت ملكة الجمال السورية سارة نخلة برنامج "نفسنة" ومذيعاته، بعد موقف غريب جدا تعرضت له، أثناء استضافتها في إحدى الحلقات، والتي علمت بعد ذلك أنها لن تعرض.

سارة كشفت ما حدث معها، على حسابها على "الفيس بوك"، حيث قالت: "من شهرين تقريبا استضافوني في برنامج نفسنة.. وصلت الاستديو وبعد انتظار أكثر من 5 ساعات عملت مكياج وشعر وبقيت جاهزة وأنا كل شوية أسأل هو في ايه يا جماعه وبعدين يا جدعان وأنا عايزة امشي بس عيب جدا عشان زميلتي العزيزة هيدي كرم هي الّي اقترحت استضافتي بعد لقائنا في تصوير مسلسل هبة رجل الغراب مشكورة طبعا وعشان أنا كنت متحمسة للحقلة عشان فاكراها حلقة ضحك وهزار وفرفشة".

وأضافت: "المهم بقا بعد كل الانتظار دا بسمع صوت ردح وزعيق وصريخ وكلام فظيع غريب مش هكتبه عشان عيب اوي المهم طلعت الأستاذة بدرية والأستاذة انتصار مع كل احترامي ليهم طبعا وأنا مفيش بيني وبينهم إلا كل خير وحب بيتخانقو مع حبيبة علشان سابت البرنامج ومشيت فبالتالي اتاخرو عشان يفهمو هيعملو ايه.. طلعت صورت وكانوا لطاف جدا انتصار وبدرية وهيدي حقيقي كانت حلقة لطيفة جدا.. عدا شهرين وأنا بسال ايمتا حلقتي هتطلع والإنتاج يقولي كمان شوية وكمان شوية وكمان شويتين المهم بقا من خمس ايام عرفت من الإنتاج أن الحلقة مش هتتعرض وأنا قولت أستنا خمس ايام قبل ما التسرع واكتب البوست".

وتابعت: "خير انشالله .. قالك ولله المذيعات طالعين مش حلوين.. نعم يا فندم هو مفيش مونيتور هو مفيش مخرج كان قاعد بيشوف هو مفيش ناس متابعه.. قالك ولله المذيعات كانوا متوترات بسبب الي حصل قبل الحلقة.. ومعليش يا استاذة احنا هنعيد الحلقة.. نعم.. يعني مطلوب مني ارجع امثل واعيد الي عملته عشان المذيعات كانوا متوترات.. السؤال هنا .. بصراحة شابو على برنامج التمثيل النفسناوي البحت.. السؤال هنا هل سبب عدم العرض هو اني قولت في الحلقة اني بحب حبيبة الكيوت اللذيذة المحترمة أو لأني كنت عفوية وطبيعية جدا وهم متعودين على التمثيل.. معلومة لا تعرفوها عن برنامج نفسنة بقا.. بيعرضو الي هم عايزينو والباقي بيروح بالمونتاج وش.. وحواري دا اتكرر مع اكثر من فنان منهم محمد سليمان والخناق حصل بوجوده والفنان عمرو عبد العزيز".

واختتمت كلامها بقولها: "لازم اتشكر معدة البرنامج حنان حسين عشان تعبت معايا وتابعت معايا وكانت متحمسة زيي أشكرك.. اشكر هبة مجدي على المكياج وبشكر غادة حشاش على الفستان ودا واجب عليا عشان الناس دي تعبت وتعبها ماتقدرش وطلع.. #احترموا_الناس عشان نحترمكم".