منى زكي تهنئ أحمد السقا بعيد ميلاده.. وتكشف أسراره في الكواليس.. فيديو

حرصت النجمة المصرية منى زكي على تهنئة صديقها النجم أحمد السقا بعيد ميلاده، والذي يوافق يوم 29 فبراير.

منى قالت: "بتربطني بأحمد السقا عشرة طويلة، وهو من أجدع وأكرم الناس اللي ممكن تقابلهم، هو كريم جدا، يعني أكتر اتنين كرما شوفتهم في حياتي أحمد السقا واحد منهم".

وأضافت، في تقرير مصور عرضه برنامج "التاسعة" خلال استضافته لأحمد السقا: "السقا جدع جدا بيقف جمب كل أصحابه، بيحب شغله جدا وبيجتهد فيه أوي، وإحنا عشرة طويلة، يعني إحنا مربيين عيال بعض وعارفين عائلات بعض".

النجمة المصرية كشفت عن تغير حدث في شخصية أحمد السقا، بقولها: "كلنا واحنا صغيرين بنبقى أكتر حماسة وأكتر تسرع، لكن السقا دلوقتي بقى أهدى وأعقل وبيوزن الأمور أكتر، مبقاش مندفع ومتسرع زي زمان".

منى وجهت تهنئة خاصة للسقا في عيد ميلاده، بقولها: "يا سموراي إحنا بنموت فيك وبنحبك وربنا يديك الصحة ودايما تعمل حاجات تجنن، وكل سنة وانت طيب وعقبال 200 سنة.. كل سنة وانت طيب".

السقا عبر عن سعادته الشديدة بهذه المفاجأة، ورد على تهنئة منى، قائلا: "وانتي طيبة يا منى وربنا يعزك ودي أحلى مفاجأة انتوا عملتوهالي، أنا ومنى عشرة خاصة جدا، وأصحاب بيوت وواكلين عيش وملح مع بعض، وحلمي كان زميلي في المعهد وهو أخويا وعشنا مع بعض كتير فشهادتي مجروحة فيهم".

أما عن لقب "سموراي" الذي دعته به منى في مقطع الفيديو، كشف السقا أن هذا هو لقبه في الوسط الفني، وهو يعني "المقاتل".

ومن ناحية أخرى قالت الإعلامية ناردين فرج، إنها هاتفت منى زكي قبل لقائها مع السقا، لتسألها عن طبيعة شخصيته في كواليس أعماله.

منى كشفت لناردين عن أسرار السقا في الكواليس، حيث قالت إنه يكون مركز في عمله لذا فإنه لا يتكلم كثيرا في الكواليس، كما أنه يكون متوتر كثيرا نظرا لخوفه الشديد على العمل.

النجمة المصرية كشفت أيضا إن السقا لا يأكل إطلاقا في الكواليس، وهو ما أكد السقا على صحته، قائلا: "فعلا صح مبعرفش آكل وأنا بشتغل، الأكل بالنسبة لي مش من متاع الدنيا اللي بحبها، وباكل لما أدوخ أو لما يجيلي هبوط".