بدأت بالفلوس وانتهت بالاعتذار.. قصة زعل أحمد السقا وتامر حسني
فاجئ النجم أحمد السقا، صديقه الفنان تامر حسني، بعدما كشف للمرة الأولى عن خلافه معه عندما استضافته الإعلامية وفاء الكيلاني في برنامجها الجديد "السيرة".
الحكاية بدأت عندما سألته وفاء:"امتى آخر مرة كنت فاكر إن حد أخوك وطلع مش أخوك؟"، ورد السقا: "أنتي عارفة إني بتكسف ومش هقول، لكن المرة دي هقول، أنا في حد زعلان منه وحتى الآن مقولتلوش، أنا زعلان من تامر حسني.. أنا بحب تامر جدا ولو مش بحبه مش هزعل منه".
وأضاف:"زعلان منه عشان هو في فيلم "الفلوس" كلمني وقالي إنه عايزني أعمل معاه مشهد، وهو الحقيقة كان جاملني في مسلسل "ولد الغلابة"، وعادة بروح حفلات وأقدمه ده العلاقة اللي ما بينا، وبعد ما عملتله المشهد فوجئت إن الفيلم نزل إنه بطولة تامر وأحمد السقا وصورة معاه على الأفيش، كلمته قولتله إيه اللي بيحصل ده، يا تامر مرة قالي دول فانز، ومرة قال دول الشركة المنتجة، قولتله أنا معرفش حد منهم أنا معرفش غيرك، ودي أثرت عليا جدا نفسيا وعليا في شغلي".
ووجهت الكيلاني سؤالًا كالتالي:"وهل هذا الموقف أثر على علاقتك بتامر؟".. فرد السقا: "مش هتأثر لو قابلني دلوقتي وقالي كلمتين حلوين الموضوع هيخلص، لكن أنا زعلت، لأن أنا لا يمكن أعمل فيه كده، ميصحش كده، وهو كان بإيده يمنع الكلام ده، بس كان شكله مشغول لكن اللي حصل حصل وأنا مسامحك يا تامر لكن مشاكلك كترت".
وبعد تصريحات السقا، عبر تامر حسني، عن زعله خاصة أنه لم يتكلم معه بشكل خاص وجعل الأمر على الهواء، وكتب تامر عبر حسابه الشخصي على "انستجرام":" حبيبي وأخويا وصديق العمر ونجم الدنيا كلها أحمد السقا، كنت أتمنى انك تكلمني بيني وبينك، ولو كنت زعلان من أي حاجة أو فاهم أي حاجة غلط، لأن الحجات دي لا يمكن تفوتك، وأنا كنت أتمنى مكتبش الكلام دا هنا، بس عشان بعد كلامك في التلفزيون، الجمهور الكريم بقى ليه حق إنه يفهم الصح".
وأضاف: "عشان أفكرك بس، أنت كلمتني وقلت لي فيه خبر في موقع، وعليه صورة افتراضية للفيلم، وكاتبين أنك بطل في الفيلم، وأنا رديت عليك ان دي اجتهادات صحفية والصورة من تصميم محبين اللي اكيد فرحوا بالخبر اننا مع بعض، حتى أنا مقولتش ان دي الشركة المنتجة، لأنها شركة كبيرة، ولا يمكن تعمل كدا، لأن الفيلم متباع للخارج والداخل باسم أخوك تامر حسني، نزل والناس كلها شافته، وأنت مش فيه ولا فيه اسمك، كل الأبطال طالعين مرسومين، ومعرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة".
وتابع: "أنا شرحتلك دا من سنة واتكلمنا بعدها، مرة عيدت عليك في عيد ميلادك والتانية بخصوص برنامجك، ولو كنت لسه زعلان كنت هتقولي ساعتها، الفيلم بقاله سنة يا أحمد".
واختتم حديثه قائلا: "أنت حبيبي يا أحمد وصديق عمر، عشان كدا أنا اللي مش هزعل منك، معلش طولت في الكلام، لأن برضوا زعلك يعز عليا".
تامر حسني
تامر حسني
وقرر أحمد السقا، أن يعتذر لتامر، بعدما صرح عن خلافه معه على الهواء، وكتب عبر صفحته الشخصية بموقع التواصل الاجتماعي "فيسبوك":"رسالة إلى صديق عزيز.. صديقى وأخى العزيز تامر حسنى.. أنت عارف اللى بينى وبينك عيش وملح وحاجات كتير، قد أكون أخطأت إنى اتكلمت في الموضوع ع الهوا ولكن يعلم الله كم كنت مجروحا وكم كنت حزينا".
وتابع:"مش هطول عليك أكتر من كده ولو أنا زعلت شوية وأنت شوية نبقى خالصين يا عم.. تامر حسنى إحنا اللى بينا كتير متزعلش يا عم وحقك عليّ.. وميعادنا الحفلة اللى جاية.. أحمد السقا".
احمد السقا