خطيبة تامر عاشور السابقة تخرج عن صمتها: "قالي أنه مطلق.. وكان بيرفض انسحابي"

خرجت دارين حلمي، خطيبة المطرب تامر عاشور السابقة، عن صمتها كي توضح للجمهور قصة ارتباطها به رغم أنه متزوجًا من سمر أبو شقة.

وكتبت دارين عبر حسابها الشخصي بموقع تبادل الصور والفيديوهات الشهير "انستجرام":"بسم الله الرحمن الرحيم يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ صدق الله العظيم.. نظرًا لإتهامات وإشاعات اتوجهت لي الفترة اللي فاتت وبدون وجه حق فكان لازم أخرج عن صمتي وأوضح موقفي لاأن مش دارين اللي تاخد راجل متجوز أو تكون سبب في خراب بيت حد، وبالتالي مليش ذنب في أي حاجة تامر دخل البيت من بابه واتقدم لأهلي رسمي على أساس أنه مُطلق وده اللي أنا كنت فاهماه زيي زي جمهوره _ عادي أن بنت ترتبط براجل مُطلق مش أزمة_ وحصلت الخطوبة بشكل رسمي زي ما عرفتوا ومشيت الأمور في مجراها الطبيعي لحد ما بالصدفة اكتشفت إنه لسه زوجته على ذمته وفيه قضايا بينهم ولم يتم الانفصال بشكل رسمي".

دارين حلمي

وأضافت:"أي بنت في الموقف ده طبعًا لازم تنسحب مهما كان الحب ومهما كانت العواطف لأن مش دارين حلمي اللي تاخد راجل من زوجته مهما كان هو مين، كده كده أنا كنت مستمرة في مسابقات ملكات الجمال وليا الكاريير الخاص بيا، فكل مرة بقرر الانسحاب كان تامر بيرفض وإن كده كده الطلاق قائم سواء أنا في حياته أو لأ وده مش يخصني في شئ".

وتابعت:"وفي الآخر أنا صممت على فسخ الخطوبة بمنتهى الاحترام ما بيني وبينه لأنه مينفعش وكل التوفيق والنصيب بإيد الله ربنا يوفقه في حياته ويوفقني في خطواتي الجاية إن شاء الله، تامر إنسان محترم مشفتش منه غير كل خير واحترام وحب وأنا بحترمه على المستوى الفني والشخصي لكن ده نصيب وربنا يوفقه في حياته".

واختتمت حديثها قائلة:"أتمنى محدش يتكلم في حاجة ميعرفش تفاصيلها وشكرا لكل الناس اللي بتحبني وعارفاني كويس، أظن أنا جاوبت على كل حاجة ومش هفتح الموضوع ده تاني نهائي أرجو احترام موقفي".

وكانت سمر أبو شقة، زوجة المطرب تامر عاشور، قد أكدت أنها متمسكة بشكل كبير بطلاقها منه، دون الكشف عن أسباب واضحة، مشيرة إلى أنهما لا يعيشان في منزل واحد خاصة أن موعد الانفصال بشكل رسمي اقترب.

وردت سمر، على العديد من الأسئلة التي كانت معظمها عن السبب وراء انفصالهما وأيضًا تمسكها بقرار الطلاق، وذلك من خلال خاصية الـ"ستوري"، بموقع تبادل الصور والفيديوهات الشهير "انستجرام".

وجاء رد سمرعلى الأسئلة كالتالي:"لسة متجوزين بس مش عايشين سوا، أنا متمسكة بطلب الطلاق وخلاص قرب، الحمدلله أنا مبقتش ضعيفة اني اتجنب الكلام في الموضوع وقد قراري اللي خدته من سنة ونص ولسة مصممة عليه".