شهيرة: محمود ياسين أصيب بتصلب شرايين أدى إلى زهايمر.. وخدمته دون مساعدة عشان ماينكشفش على غريب

كشفت الفنانة المصرية شهيرة تفاصيل المرض الذي أصاب زوجها الفنان الراحل محمود ياسين في سنوات عمره الأخيرة.

شهيرة قالت، خلال استضافتها في برنامج "معكم منى الشاذلي" على قناة cbc: "أصيب بتصلب في الشرايين أدى إلى الزهايمر لكنه مش شرس، فهو مفقدش الإدراك، لكنه مش محمود ياسين اللي إحنا نعرفه، مكنش بكامل لياقته الصحية والذهنية".

الفنانة المصرية أكدت: "محمود ياسين لأخر أسبوع كان مدرك وعارفنا كلنا، هو عمره ما تاه عننا، لكن الشهر الأخير في حياته كان الأصعب صحيا".

وعن رد فعل محمود ياسين حينما علم بمرضه، قالت: "ولا حاجة.. ولا كأنه سمع حاجة.. وإحنا سكتنا إحنا كمان، يمكن مكنش عايز يفزعنا، الدكتور لما كان بيختبره عشان يشوف ذاكرته كان يجاوب وهو يستنكر ده.. اللي هو يعني معقول أنا هنسى ده؟ الدكتور قالي وقتها أستاذ محمود صغير أنه يجيله تصلب في الشرايين قوي كده".

وتابعت: "فى سنوات مرضه الأخيرة عرض علىّ أبنائى أن يكون هناك شخص يساعدنى فى خدمته، ولكنى رفضت ذلك بشدة لأنى مش عاوزة ينكشف على حد غريب، كما إنى أؤمن أن الله قد سخرنى لخدمته لأنه رجل استثنائى وعظيم بالنسبة لى".