بعد الخطوبة.. محمد عطية لـ ميرنا الهلباوي: شكرا انك وافقتي تكوني معايا.. والأخيرة: "أنت دعائي المستجاب"

تغزل الفنان المصري محمد عطية، بالإعلامية ميرنا الهلباوي، بعد أن احتفلا بخطبتهما الجمعة الماضية الموافق 20 نوفمبر.

ونشر عطية صورة جمعته بميرنا، وعلق عليها عبر صفحته الشخصية بموقع التواصل الاجتماعي "فيسبوك":من اربع سنين قابلت ميرنا في الراديو كانت بتعمل معايا لقاء عشان اغنيتي الجديدة انا و انطوني توما و لما قعدنا نتكلم كنت معجب جدا بافكارها و قناعاتها و خدت رقمها و بعد ما مشيت من الراديو انطوني قاللي( علي فكرة انت هترتبط بميرنا ) و ضحكنا و خلاص و حاولت المحلها اليوم ده علي الواتس اب باليل و احنا بنتكلم اني معجب بيها و هي ما كانش في بالها".

وتابع:"وبعدين عرفت انها مصاحبة و بعدها اتخطبت ففقدت الامل و بقينا صحاب و فضلنا نتكلم من وقت للتاني و بعدين سافرت لبنان قعدت فترة كبيرة هناك و خلال الوقت ده كنت ضد الارتباط و الجواز لحد ما رجعت و اتفقنا نتقابل عشان بقالنا فترة ماشفناش بعض و نزلت قابلتها و بنتكلم و في نص الكلام بسألها عن خطيبها قالتلي انهم انفصلوا و هنا كل حاجة اتغيرت و بدأت اشوفها تاني برة منطقة الصداقة و كنت عارف كويس اني لو فتحت باب اني احب تاني هتكون ميرنا حب حياتي عشان مختارها بعقلي و قلبي مش قلبي بس و عشان الارتباط بحد كنت صديق ليه بيكون مختلف تماما و مختصر مسافات كتير".

محمد عطية وميرنا الهلباوي

وأضاف:"كل حاجة مشيت بسهولة و بسلاسة و فجأة اكتشفت اني مستحيل اقدر اكمل حياتي من غيرها و اني اليوم اللي مابتبقاش موجودة فيه بيكون سخيف و من كتر ماهي انسانة مريحة و سوية و بحس معاها اني مش محتاج اكون شخصية تانية لقيتني بقول لأمي عاوزين نروح مقابل مامت ميرنا ووصلنا من الراديو للحظة اني اخترت اكمل حياتي معاها".

واختتم حديثه قائلًا:"شكرا علي وجودك و شكرا انك وافقت تكوني معايا بحبك".

وردت ميرنا الهلباوي عليه قائلة:"أنا سعيدة جدًا لأننا التقينا وممتنة جدًا لكل دقيقة قضيناها معًا شكرًا لوجودك في حياتي، لم أفكر أبدًا في أن رجل أحلامي موجود وقريب جدًا شكرا لكونك أنت وشكرا لك للسماح لي أن أكون على طبيعتي، أنت دعائي المستجاب.. أحبك كثيرًا كحبيب، عاشق ، كصديق وانسان".

محمد عطية وميرنا الهلباوي

وبعد حفل الخطوبة خضع محمد عطية وخطيبته ميرنا لجلسة تصوير مميزة، أطلا فيها بملابس شتوية أنيقة.

وكان الفنان محمد عطية نجم برنامج "ستار أكاديمي" قد أعلن الشهر الماضي ارتباطه بمقدمة البرامج ميرنا الهلباوي، بشكل فاجئ به الجمهور خاصة أنه لم يكشف من قبل عن هذه الخطوة.