محمد صبحي يرد على انتقادات تمثال تكريمه للفنانين: مش نرجسية.. وكان ممكن أعمل جايزة بلاستيك بـ 150 جنيه
تعرض الفنان المصري محمد صبحي للكثير من الانتقادات، بسبب التمثال الذي قدمه للمكرمين، في الاحتفالية التي أقامها باسم "50 سنة فن"، والذي جاء كمجسم لرأس صبحي.
محمد صبحي رد على هذه الانتقادات، بقوله إن احتفالية 50 سنة فن كان هدفها تكريم كل من شاركوا في مسيرته وأبدعوا فيها، قائلا: "حبيت أقولهم شكراً لأنكم أضفتم ليا هذا الإبداع".
وتابع: "أنا مبحتفلش والمفروض غيري يحتفل بيا، وكرمت كل زمايلي من العامل إلى أكبر نجم، و أنا فخور بتكريم 120 نجما، فأنا سعيد بفرحة النجوم المكرمين مش الجوايز إللي بتاخد في المهرجانات حتة البلاستيك أو الخشبة إللي مش معروف مين صاحبها ويجي الأولاد بعد كدا ميعرفوش مين كرم أبوهم، إللي بيكرم حد باسمه لازم يحط الذكرى دي في سياقها".
وعن فكرة التمثال، قال: "التمثال دا صممه لي عام 1976 الفنان النحات العظيم جمال السجيني وكان هذا آخر تمثال صممه وصمم من قبل ونحت تماثيل لكل من أم كلثوم وطه حسين والعقاد وتوفيق الحكيم ولكنه طلب مني أن يقوم بعمل تمثال لي لأنه كان معجبًا بملامحي فقلت له: "أنا لسه معملتش حاجة"، ولكنه أكد إعجابه بملامحي وأهداه لي وهذا التمثال موضوع في متحف المسرح الخاص بي.
وعن منتقدي تمثال تكريمه للفنانين، قال : دي كتائب مجهزة الرد لا حضروا ولا حد دفع حاجة من جيبه وكان ممكن أعملها بلاستيك أو خشب بـ150 جنيها".
محمد صبحي
وتابع : "أنا راجل بتداري ومش بتكلم عن نفسي، وأنا مش بكرم نفسي، التمثال مش نرجسية على فكرة وأنا برسخ قيمة إنسانية عالية وهو تكريم العامل وابنه يشوفه ومفيش فنان صنع نجوميته بنفسه، في أوروبا ودول العالم أجمع مفيش فنان بيكرم زميله وأنا أول واحد أعمل كدا".
وأكد صبحي: "إللي بيكرمني جمهوري الحقيقي، وفيه ناس مكنتش مقتنعة بفكرة التكريم ومجتش رغم إنها هتتكرم بس فيه كتير جداً مقتنعين".
وأضاف: "أنا أشكر كل الناس الذين دافعوا عني بخصوص هذا الأمر لأنهم لديهم نضج برغم أن هذا الجدل لا يعنيني لأن المنتقدين تركوا كل شيء في الاحتفالية التي لم يحضروها وركزوا علي ذلك الأمر إذن هؤلاء أشرار لم يحاولوا فهم الموضوع ولذلك فهذا ليس نقدًا فهم لديهم نية في الانتقاد" .
واستطرد: "كل إللي خدوا تمثال "50 سنة فن" شكروني تاني يوم، وكل إللي خدوا تمثال "50 سنة فن" قالولي كفاية نحطه في بيتنا وكفاية ولادنا تشوفه.. الجهلة ميهمهمش الهدف من التمثال وطريقة التكريم، أنا عندي حيثيات التكريم ومش بجامل حد.. سيرتي في الفن "بروفة" وفخر بالنسبة ليا".
وعن انتقاد البعض لتكريم نجلته بالحفل، قال: "دا عيل تافه ولا اتنين تلاتة، بنتي طلعت تستلم جايزة والدتها ووالدتها مش فنانة في الأساس".