إصابة زوجة خالد الصاوي بفيروس "كورونا": جمعية ودايرة.. ومش هدخل خالد البيت

أعلنت مي كريم، زوجة الفنان المصري خالد الصاوي، إصابتها بفيروس "كورونا" المستجد، وذلك على حسابها الخاص على موقع "الفيس بوك".

زوجة خالد الصاوي كتبت: "أنا كورونا وبالبشاميل كمان، حاجة كده انزيمات كبد على تجلطات فى بروتينات الدم، ما شاء الله.. دعواتكم".

زوجة خالد الصاوي

وقالت زوجة الفنان المصري، في مداخلة هاتفية ببرنامج التاسعة على القناة الأولى: " كورونا وباء عالمى ولن يصيبنا إلا ما كُتب لنا، وهى زى ما بيقولوا المصريين جمعية ودايرة".

وأضافت: "أنا مش عارفة جالى منين وكل المهرجانات الناس كانت ملتزمة جدا، ولكن أحنا بننزل شغل كل يوم، أنا بشتغل في مجال الإعلانات والأسبوع اللى فات اشتغلت يومين ورا بعض وحسيت بكحة وقولت إنها إنفلونزا أو دور برد عادى، وقعدت أسبوع وعملت تحليل وطلع سلبى.

وتابعت: "لكن اللى عرفته بعد كده إن المسحة بتكون نسبة دقتها من 60 إلى 70% وعملنا مجموعة تحاليل ولقينا الأمور مش متظبطة، المفروض الواحد كل فترة يحلل مجموعة تحاليل علشان يتطمن على نفسه، ومن الممكن ألا تظهر كفيروس لذلك لا يكتفون بمسحة واحدة ولكن بيعملوا مسحة تانية بعد أسبوع".

واختتمت كلامها، بتأكيدها أنها لن تسمح لزوجها بدخول المنزل حتى لا يصاب، حيث قالت: "خالد الصاوى ما كانش متواجد في البيت كان بيصور في الإسكندرية وأنا بطمن كل الناس عليه وطبعا مش هيخش البيت، وفى حالة تكافل غير طبيعية وسط الأزمات حاجة خاصة فى الشعب المصرى دائما بتذهلنى".