بعد هجومها على عفاف شعيب بسبب تصريح "غسل الراجل للمواعين".. آيتن عامر: هي مش خناقة

هاجمت الفنانة آيتن عامر، النجمة عفاف شعيب، بعد تصريحها المثير للجدل حول مساعدة الرجل لزوجته في المنزل وخاصة في غسل الصحون "المواعين".

ووضحت آيتن بعد تعليقها على تصريح عفاف شعيب ما تقصده من وجهة نظرها، وكتبت تغريدة عبر حسابها الشخصي بموقع التدوينات القصيرة "تويتر":"توضيح مهم.. أنا استخدمت المساحة الصغيرة للاختلاف مع الأستاذة الكبيرة اللي كلنا اتعلمنا منها عفاف شعيب، ولكن هذا لا يقلل من احترامي ليها ولمشوارها الفني الكبير".

وتابعت:"أنا بس حبيت أعرض وجهة نظري أنا وكل زوجة مطحونة في محاولة مني لتشجيع الأزواج على مساعدة زوجاتهم مش أكتر.. هي مش خناقة".

وقالت عفاف في تصريحها المثير للجدل:"البنات فين أهاليهم ما علمهومش بيتك ولازم تكوني نضيفة في بيتك وشكلك، في مثل بيقول في رجال وفي رج رج، الراجل اللي بيغسل المواعين ده يبقى رج رج أنصاف رجال يعني، والبنات متزعلش، البنات تحافظ على بيتها وجوزها، وكفاية جواز وطلاق، يمكن هو طيب، ساعديه واتعاوني معاه، أنا مش ضد إنه يغسل المواعين بس في نفس الوقت متخليهوش كراجل تتقل قيمته".

وأضافت:"الست ست والراجل راجل، الرجال قوامون على النساء بما أنفقوا، هو بينفق، ولو هي بتشتغل يفهموا بعض ويتعاونوا، في بنات بتطلق من تاني شهر ليه؟ حافظي على بيتك وخلفي عيل ولا عيلة، نسبة الطلاق عندنا بتزيد لأن مفيش توجيه صح".