بعد انفصال 22 عاما.. محمد الصغير يعيد زوجته لعصمته في العناية المركزة

روت المذيعة المصرية مها الصغير، زوجة النجم أحمد السقا، تفاصيل قصة حب والدها ووالدتها، خاصة بعد تدهور الحالة الصحية لوالدها خبير التجميل محمد الصغير بسبب إصابته بفيروس كورونا.

ونشرت مها صورة ظهر فيه والدها ووالدتها وهما ممسكان بيد بعضهما، معلثة عبر حسابها الشخصي على "انستجرام":"في حاجه مهمه أوي عايزه كل العالم يعرفها، و اكيد مش هعرف أكتب الكلام ده تاني...أبطال القصة دي هم أبي و حياتي كلها و اللي يعرفني كويس يعرف أن محمد الصغير مش أبويا بس هو حب عمري،والبطلة التانية هي أعظم ست في العالم ملكه العلايلي".

وتابعت مها:"قصة حب عشتها علي مدار كل يوم و كل ثانيه لغاية اللحظه حتى لما اتطلقوا كنت عارفه أنه بيحبها وهي بتحبه و عمري ما شفته أو شفتها سعيده غير وهي مراته، المهم أمي اتجوزت أبويا و هي من عائله ارستقراطيه و هو من عائله بسيطه و تحدت أهلها و قاطعوها وهو لم يكن معاه سوي ١٠٠ جنيه، وحصل مشاكل و اتطلقوا من ٢٢ سنة".

وأضافت قائلة:"يوم ما تعب وهو حواليه ناس كتير أوي، طلب مني أطلب أمي في التليفون وطلب يشوفها وجت له علي طول، يوم ما حس أنه ضعيف أوي وتعبان بجد طلب ضهره وسنده الي بجد مش في المنظره، وجت وطلب منها متزعلش منه وأنها تتجوزه علي سنة الله و رسوله تاني".

واختتمت حديثها قائلة:"أصدقاء الأبطال في هذا الفيلم الجميل اللي شهدوا هذه اللحظه هما أنا وأخويا مصطفي وأخويا التاني الدكتور اللي مسابنيش لحظة يحيي البستاني،الدنيا اتدربكت و طلب مأذون و جه المأذون جوز ملكه العلايلي لمحمد الصغير علي سنة الله ورسوله.. هذه العظيمه اتجوزته و هو محلتوش حاجه و في عز ضعفه و رجعت له و هو في عز ضعفه برده و نام في حضنها و هو مرتاح اوي.. هو الان في امس الحاجه للدعاء لانه في لحظات حرجه اوي اوي اوي، ادعوا له و اسفه اني طولت عليكوا".