إسلام إبراهيم يكشف عن مهنته القديمة.. ويوجه نصيحة للأمهات: بشوف المنظر ده في كل خروجة
فاجأ الفنان المصري إسلام إبراهيم جمهوره بالكشف عن مهنته القديمة، والتي منحته خبرة يستطيع من خلالها تقديم نصيحة للأمهات.
إسلام إبراهيم نشر صورة طريفة له وهو يقوم بدور طفل، على حسابه الخاص على موقع "الفيس بوك"، كاشفا أنه قبل دخوله التمثيل، كان يعمل أخصائي تخاطب وتعديل سلوك للأطفال.
الفنان المصري كتب: "معلش انا حابب اتكلم في حاجة غيظاني بعيدا عن الفن تماما بما اني كنت في يوم من الأيام اخصائي تخاطب وتعديل سلوك للأطفال وشغلي كله كان مع الأطفال وبردوا ده رأيي الشخصي المتواضع".
وأضاف: "هو لما حضرتك تبقي خارجة شارية المول كله وفي ايدك خماستشر كيس وباكد انه المول مش السوبر ماركت وطلبات البيت وواقفة ذالة العيل قدام بتاع الكاندي وبتقوليله هنشتري حاجة واحدة بس والطفل يا قلب امه واقف في عينه حسرة وحيرة ومش عارف يعمل ايه وهو واقف قدام كل الاغراءات والالوانات دي".
وتابع: "حضرتك كده متخيلة انك تربوية؟!!! ....لو هتلزمي الطفل انه يشتري حاجة واحدة بس يبقي لازم انتي كمان تشتري حاجة واحدة بس....الطفل حضرتك اذكي مني ومنك وذاكرته البصرية اعلي مني ومنك عينه دي عبارة عن كاميرا بتخزن كل حاجة ...عينه شايفة الاكياس في ايدك وودنه بتسمع العكس".
واستطرد: "للأسف بشوف المنظر ده في كل خروجة وبقي بيتكرر كتير جدا اكيد تربويا لازم نعلم الطفل يبقي عنده قناعة ورضا وان مش كل حاجة بنشوفها نقدر نجيبها بس لازم نبدأ بنفسنا الأول نفسي نبطل نبقي حافظين مش فاهمين".
إسلام إبراهيم اختتم كلامه بمزحة، حيث قال: "طبعا لو الطفل اللي في الصورة ده محدش يجيبلوا حاجة اصلا".
اسلام ابراهيم