بعد إعلان اعتزالها.. حسام داغر لـ ميمي جمال: ارجعي ومتسيبيناش

عبر الفنان المصري حسام داغر، عن حزنه الشديد بعد إعلان النجمة ميمي جميل اعتزالها الفن، حيث طالبها بالرجوع عن قرارها.

ونشر داغر صورة تجمعه بالفنانة، وعلق عليها من خلال حسابه الشخصي بموقع تبادل الصور والفيديوهات الشهير "انستجرام"، قائلًا:"بقى معقول القمر دى يعتزل، إزاى يا ميمى يا أجمل ست فى الدنيا، ده أوحش خبر سمعته، ده انتى اللى فاضلالنا من زمن كان جميل، انتى وعم حسن الله يرحمه، كنت أشوفك بس اتبسط، إنتى بس أكيد بتشوفى غلاوتك عندنا وأننا منستغناش عنك".

وتابع:"طب أنا هتحايل عليكى شوية، حاسس بيكى وانتى اللى عندك لسه كتير يا كتلة الحنان والطيبة، متزعليش من ناس فى الوسط ميعرفوش قيمتك، انتى اللى يعرفك كويس مش بس يحبك، ده يموت فيكى، جاية تسيبينا بعد ما الجميلات راحوا، هيتبقالنا مين، كدة الجمال فى الشغلانة هيقل يا ميمى يا جمال يا ملكة الجمال، قولولها ارجعى ومتسيبيناش".

قالت ميمي خلال مداخلة هاتفية مع الإعلامية قصواء الخلالي في برنامج "المساء مع قصواء:"أيوه حقيقي اعتزلت من ساعة المرحوم جوزي ما توفى، الحاج حسن مصطفى، بعدها قعدت سنة أو سنة نص تعبانة نفسيا، عشرة عمر، بقالنا أربعين، حاجة وأربعين سنة".

وتابعت:"لقيت كفاية كده، أنا اشتغلت كتير، أنا باشتغل من وعندي 9 سنين، عملت كذا فيلم وعندي 9 سنين، أقوى من الحب، ومع كمال الشناوي، وزهرة العلا."

وأضافت:"الوقت ده كله وأنا بشتغل، خلفت ولادي وأنا باشتغل. والدتي الله يديها الصحة هي اللي قدرت تقف معايا في ولادي. دلوقت قلت كفاية، أشوف ولادي وأحفادي ونفسي شوية، وفعلا أنا اعتزلت خالص دلوقتي."