فيديو.. أحمد زاهر يعتذر لـ هيدي كرم بسبب ضربه لها في "لؤلؤ": وشها ورم ووجعها قطعنى من جوه

عبر الفنان المصري أحمد زاهر عن سعادته بردود الفعل على دوره فى مسلسل "لؤلؤ"، والذى يجسد فيه شخصية طارق نصار.

زاهر قال، خلال استضافته في برنامج "كلمة أخيرة" على قناة ON: "سعيد جداً جدا بردود الفعل وفيه حاجة غريبة كل ما أمشى فى حتة ألاقى الستات بتبصلى وتبتسملى أى ست تبصلى وتبتسم.. والدور جاى مع السيدات جداً جداً ورغم إن طارق شخصية بها عيوب لكن مافيش إنسان طيب طول الوقت ولا شرير طول الوقت”.

وأضاف: "ممكن أكون كويس مع حد ووحش مع حد تانى، شخصية طارق مش شريرة ولا خبيثة بس هو رجل عملى بيزنس مان، تربى فى عائلة أرستقراطية جداً، فى النهاية برضه من عيوب الشخصية إن طارق أنانى وبيحب نفسه، ويهمه اسمه قبل كل شيء وسمعته وشكله، لكن عندما حب لؤلؤ تخلى عن كل شيء إيماناً بالحب".

وقال عن عنفه مع السيدات في المسلسل، قال: "السيناريو عايز كدة بس الضرب فى المسلسل مرتين كان بجد وبقية المرات كان تكنيك مش حقيقى.. الصفعة الحقيقية كانت لنجلاء بدر فى الحلقة الأولى وصفعة هيدى كارم كانت حقيقية".

زاهر وجه اعتذارا لهيدى كرم عن صفعته لها، بقوله: "عاوز أعتذرلها جداً هى طلبت يكون القلم حقيقي ولما ضربتها الأه اللى طلعت منها فى المشهد قطعتنى من جوه، ووشها ورم بعدها، بعد كده الأستاذ محمد سامى قال بلاش ضرب بشكل حقيقى".

وأضاف: "لو أنا مكانها هاخد القلم بشكل حقيقى لأن الضرب الحقيقى بيطلع إحساس كبير عشان الوجع بيخلى ريكاشن الممثل صادق وحقيقى، وأنا بضرب فى المشهد ببقى مضايق جداً".