فيديو| لم تتمالك نفسها.. دينا تبكي: كورونا فيروس سخيف والخناقة معاه مش تمام

تحدثت الفنانة المصرية دينا، عن فترة إصابتها بفيروس كورونا "كوفيد19"، والتي أعلنت تعافيها منه بعدما خضعت لمسحة وكانت النتيجة سلبية.

وقالت دينا في مقطع فيديو نشرته عبر حسابها الشخصي بموقع تبادل الصور والفيديوهات "انستجرام":"في الحقيقة أنا وحشني كل حاجة، وحشني أمشي في الشارع، وحشني السوبر ماركت، وكل حاجة وحشتني جدًا، أنا مش من عادتي أطلع فيديو كتير، ولكن لقيت الناس عمالة تتكلم إني روحت مستشفى ولا عملت إيه، فقلت أفهمهم.. وقلت لازم أطلع للناس اللي مهتمة تعرف أخباري، أطمنهم إني بتعافى بعد ما اكتشفت أن النتيجة كانت سلبية، وطبعًا ده فضل ربنا عليا إني قمت بالسلامة، ادعولى أقوم بصحة أحسن، لأن الخناقة مع الفيروس ده مش تمام، وفيروس صعب وسخيف جدًا، وبتمنالكو كل الخير ومحدش يجيله كورونا، وخلوا بالكو من نفسكو جداً".

ولم تتمالك دينا نفسها وبكت، حيث أضافت في حديثها:"اتعلمت من التجربة دى إن فى حاجات كتير الواحد بياخدها آه مسلم بيها، ولكنها نعم كبيرة، مجرد النزول والمشى فى الشارع نعمة مش حاسين بيها وأول حاجة حرصت عليها بعد التعافى رؤية أمى وبعدما اكتشفت أن المسحة سلبية وأنا بشوف أمى حسيت إن فى جايزة كبيرة، مش حاجة عادية".

دينا

وتابعت:"شكرًا لكل الدعم اللى خدته، ولولا أصحابى وأهلى، مكنىش خدت الدفعة الجامدة جدًا، اللى وصلتلها، لأن الكلام ده قومنى من اللى أنا فيه، وأول حد بشكره أمى، اللى ما رضيتش تسيبنى ولا تسيب البيت، وفضلت قاعدة معايا طول الوقت، أنا اللى كنت خايفة عليها وهى ما كنتش خايفة".