بعد بكائها.. نبيلة عبيد لـ دينا: ربنا يكمل شفاكي على خير ويخليكي لأبنك

عبرت النجمة المصرية نبيلة عبيد، عن حبها الشديد للفنانة دينا، مؤكدة أنها من الشخصيات المحترمة والراقية، متمنية أن يكمل الله شفائها على خير بعد تعافيها من فيروس كورونا.

ونشرت نبيلة الفيديو التي تحدثت فيه دينا عن فترة مرضها وبكت فيه، وعلقت عليه من خلال حسابها الشخصي بموقع تبادل الصور والفيديوهات "انستجرام"، قائلة:"الست ديه انا بعشقها...على المستوى الأنساني في غاية الجدعنه و الأحترام و الرقى....بحترمها و بحترم فنها".

وأضافت:"ربنا يكمل شفاكي على خير و سلامه يا حبيبتي و يخليكي لأبنك و اهلك و ناسك و يحمي كل الناس و يزيح عننا الغمه و الجائحه و يحمينا....بحبك يا دينا".

وقالت دينا في مقطع فيديو نشرته عبر حسابها الشخصي بموقع تبادل الصور والفيديوهات "انستجرام":"في الحقيقة أنا وحشني كل حاجة، وحشني أمشي في الشارع، وحشني السوبر ماركت، وكل حاجة وحشتني جدًا، أنا مش من عادتي أطلع فيديو كتير، ولكن لقيت الناس عمالة تتكلم إني روحت مستشفى ولا عملت إيه، فقلت أفهمهم.. وقلت لازم أطلع للناس اللي مهتمة تعرف أخباري، أطمنهم إني بتعافى بعد ما اكتشفت أن النتيجة كانت سلبية، وطبعًا ده فضل ربنا عليا إني قمت بالسلامة، ادعولى أقوم بصحة أحسن، لأن الخناقة مع الفيروس ده مش تمام، وفيروس صعب وسخيف جدًا، وبتمنالكو كل الخير ومحدش يجيله كورونا، وخلوا بالكو من نفسكو جداً".

وأضافت:"اتعلمت من التجربة دى إن فى حاجات كتير الواحد بياخدها آه مسلم بيها، ولكنها نعم كبيرة، مجرد النزول والمشى فى الشارع نعمة مش حاسين بيها وأول حاجة حرصت عليها بعد التعافى رؤية أمى وبعدما اكتشفت أن المسحة سلبية وأنا بشوف أمى حسيت إن فى جايزة كبيرة، مش حاجة عادية".

وتابعت:"شكرًا لكل الدعم اللى خدته، ولولا أصحابى وأهلى، مكنىش خدت الدفعة الجامدة جدًا، اللى وصلتلها، لأن الكلام ده قومنى من اللى أنا فيه، وأول حد بشكره أمى، اللى ما رضيتش تسيبنى ولا تسيب البيت، وفضلت قاعدة معايا طول الوقت، أنا اللى كنت خايفة عليها وهى ما كنتش خايفة".