بالفيديو.. أحمد زاهر: كنت سأتخلص من ابنتي "ليلى" وهي جنين.. وعيطت لحظة ولادتها

كشف الفنان المصري أحمد زاهر أنه كان سيتخلص من ابنته "ليلى"، وهي جنين في رحم والدتها.

أحمد زاهر أرجع ذلك بسبب الظروف الصعبة التي كان يمر بها في ذلك الوقت، حيث قال، خلال حواره مع الفنانة مي عمر في برنامج "بصراحة مع" على قناة MBC1: "بعد ما إتجوزت وخلفت ملك، كنا عاملين كل الموانع، وبعدين فجأة هدى حامل في ليلى".

وأضاف: "بقيت قلقان وخايف أفشل في تحمل المسؤولية، مكانش عندي شغل السنة دي أو رفضت حاجات، فقولت هنزله، هدى كانت رافضة تماما تنزل البيبي، وأنا قلت بيبي تاني في الظروف دي حاصرف عليه إزاي."

وتابع: "فضلت كده لغاية ما أمي كلمتني مرة في التليفون، وقالت لي حلمت حلم، جالي هاتف بالآية « ولا تقتلوا أولادكم خشية إملاق»، دي عطية من عند ربنا سبحانه وتعالى وإنت ترفضها، إنت مجنون. الجملة دي أثرت في قوي وحسيت برعشة، وقلت خلاص حسيبها وعلى الله".

وأكمل: "أنا بأدخل مع مراتي قوضة العمليات.. أول ما اتولدت ليلى نزلت زرقا، والحبل السري مربوط حوالين رقبتها، ومن غير صوت، مر علي دقيقتين زي سنتين، وشريط سينما في حياتي، كنت حاضيعها وأهي ضاعت".

وأضاف: "لغاية ما عيطت ولونها بدأ يفتح وأنا عيطت، لدرجة إن الدكتور قال لي أرجوك خد بنتك وإطلع بره.. كانت تجربة صعبة وقاسية جدا، وأحمد ربنا سبحانه وتعالى إني ما أخدتش القرار أنزل البيبي، وليلى أجمل حاجة في حياتي."