محمد الشرنوبي يعلق لأول مرة على حصوله على الإعدادية فقط: وقفت على سنة وكان غصب عني

علق الفنان المصري محمد الشرنوبي، على الأخبار التي ترددت مؤخرا حول شهادته التعليمية، وأنه حاصل على الشهادة الإعدادية فقط، وأكد عمه الموسيقار صلاح الشرنوبي صحة هذه الأنباء.

محمد الشرنوبي علق لأول مرة على هذا الأمر، خلال حلوله ضيفا على سمر يسري، في برنامج “يوم ليك”، على قناة “الحياة”، حيث قال: “طالما عمي أكد إني حاصل على الشهادة الإعدادية يبقى صحيح، ومش المفروض أرد عليه هو مش حاجة عيب ولا حرام ولا غلط، عشان أطلع أرد”.

وأضاف: “الخبر نزل بـ "شاهد فضيحة محمد الشرنوبي"، لأ أنا معنديش فضيحة ولا حاجة تعيب، أنا محقق حاجات كويسة جدا، وأنا الحمد لله بأصرف على نفسي من وأنا عندي 10 سنين أو 11 سنة من أول حاجة اشتغلتها، وقررت وقولت لأمي وأبويا محدش هيصرف عليا ولحد دلوقتي بصرف على نفسي من ساعتها".

الفنان المصري تابع: “الحمد لله بقى عندي بيت مسؤول عنه وبيت تاني مسؤول عنه، وحاسس إني محقق حاجات في حياتي أفتخر بيها أكتر بكتير من الشهادة”.

واستطرد: “الشهادة مهمة جدا، ومبقللش من أهميتها خالص والمفروض أي حد في الدنيا يبقى معاه مؤهل كويس وعالي، دا محصلش معايا بسبب ظروف في حياتي محدش يعرفها، هي ظروف شخصية كتير مريت بيها وبيتي مر بيها ليها علاقة بأسرتي وبيتي، فمحدش عارف حاجة أو عارف ظروف حد"ز

وأكمل: “بس أنا غصب عني كان عندي شغلي وكنت بروح دراستي، والمسؤوليات زادت وحجم شغلي زاد، ووقفت على سنة في الآخر وعندي الوقت اللي أخلصها فيه، والحكومة محددة لينا الوقت اللي نكمل فيه، بس في الآخر عندي ثوابت بتقول إني محقق وواصل لحاجة".