بعد زعلها.. والدة أيمن بهجت قمر ترد عليه: أنت البكري بتاعي
ردت والدة الشاعر الغنائي أيمن بهجت قمر،عليه بعدما كشف عن كواليس أغنية "هي الدنيا"، التي طرحتها النجمة شيرين عبد الوهاب بمناسبة عيد الأم.
:وكتبت والدة أيمن عبر صفحتها الشخصية على "فيسبوك":"حبيبى يا أيمن ما انت البكري بتاعي، ولازم أناكف فيك واتدلع عليك، قدرك أني أمك وانت الكبير، استحملني يا ولد مش قادر تستحمل أمك، حبيبي يا أيمن كل سنة وأنت طيب يا حبيب قلبي ربنا يبارك فيك وفي أولادك وإنجي حبيبتي واخواتك يارب".
وأضافت:"هو أنا ليا غيركم أمال أقرف مين يعنى يا ناس، الأغنية يا حبيبي جميلة جميلة كعادتك ربنا يحميك ويخليك لينا ودايما الكبير ياحبيبي".
ومن جانب أيمن رد عليها قائلًا:"حبيبتي يا ماما براحتك بس أنا داخل على الخمسين".
وكان بهجت قمر قد كتب عبر صفحته الشخصية بموقع التواصل الاجتماعي "فيسبوك":"المشهد ده وإحنا قاعدين في الأستوديو بنعمل أغنية هي الدنيا لشيرين عبد الوهاب بمناسبة عيد الأم، قاعد أنا وشيرين وحسام حبيب وعمرو مصطفى وشيرين عايزاني أغير كلام الكوبليه وبتقوللي أقعد خلصه هنا دلوقتي عشان ننجز بابص في الموبايل لقيت رساله من هشام أخويا أمك زعلانه منك كلمها قلت له حاضر بس أنا ف الأستوديو هخلص واكلمها قفلت معاه بس ابتديت اتوتر".
أضاف: "لسه هبدأ في الكتابه لقيت رسالة من صادق أخويا الصغير كلم ماما عماله تعيط اتوترت جدا وطلعت بره الأستوديو في عز التلج وموطي صوتي هقول للناس اللي جوه أيه بكتب أغنية للأم وأمي بتتخانق معايا إزاي؟ يا ماما معلش ماقصدش.. يا ماما أنا ف الأستوديو وسط ناس ! وهي مافيش سخنانه جدا ..ابتديت أنا اتحرج طيب يا ماما أنا وحش يا ماما أنا عاق يا ماما، معرفتش أصالحها وقفلنا المكالمه على كده ".
تابع أيمن بهجت قمر: " طبعا ماجاليش نفس أكتب الكوبليه يومها لأني فعلا ماعملتلهاش حاجة، بعدها أمي ربنا يخليهالي حست انها زعلتني ( الفرق بينا ١٨ سنه قشطه يعني ) بعتت صالحتني بس كنت كتبت الكوبليه بقى، ونزلت أهي الأغنية. كل سنة وأمي طيبة وتفضل تناكف فيا بس بلاش وأنا في الاستوديو وبكتب أغنيه للام مش ناقصين عطله يا ماما".