تعليقا على وقف مسلسل "الملك".. مها نصار: لو هنعمل التاريخ بالظبط هنطلع أحمس اتجوز اخته
علقت الفنانة المصرية مها نصار، إحدى بطلات مسلسل "الملك"، وزوجة مخرجه حسين المنباوي، على قرار وقف العمل، بسببب الأخطاء التاريخية.
مها نصار كتبت، على حسابها الخاص على موقع "الفيس بوك": "كلام الناس فوق راسي من فوق سواء بالسلب أو بالإيجاب حقك تقول اللي انت عايزه.. بس علشان أحترم كلامك لازم تكون بتتكلم صح، وعن وعي ودا ما بيتحققش غير بعد المشاهدة الجيدة للعمل.. أنا حابه أوضح حاجة صغيرة إحنا بنعمل عمل درامي مستوحى من التاريخ وليس فيلم وثائقي عن الملك أحمس وإلا كنا هنعمل اللي في التاريخ بالضبط أن الملك أحمس اتجوز أخته؛ لأن في العصر ده كان جواز الأخوات عادي".
وأضافت: "لكن إحنا بنعمل رواية اسمها كفاح طيبة للأديب العالمي نجيب محفوظ اللي قرأ الرواية هيفهم كلامي كويس.. الأديب كان ليه رؤية مختلفة من خياله ودكتور زاهي حواس في كلام سابق لما قرأ الرواية قال إنها مستوحاة من التاريخ وليست التاريخ.. فأنا مستغربة جدا لكلام دكتور زاهي حواس دلوقتي!!! مدام المخرج بيعمل رواية من خيال الكاتب ومستوحاة من التاريخ ودا طبعا مكتوب على المسلسل".
وتابعت: "فمن حقه يبدع ليه نحصر الفن في دايرة ضيقة، ونلف فيها!!! كلنا التزمنا بالرواية ودا بيحصل في العالم كله، ومش جديد أنه يضيف شخصية جديدة يغير شكل الممثلين يموت شخصية يطلعنا بنطير هو حر.. ولو كنا صبرنا كنا هنلاقي الكلام دا على التتر... الفن للمتعة والحكم دايما بيبقى فيه للجمهور اللي إحنا بتشتغل علشانه".
واختتمت كلامها، بقولها: "وإحنا جمهورنا واعٍ كفاية أنه يغير القناة لو حاجة معجبتهوش. وأنا بتحدي أي حد أنه بعد عرض الحلقة الأولى بس.. هيحصله انبهار وتشوق ومتعة وهيكمل المسلسل للآخر وهيحترم المجهود الضخم الواضح من كل صناع العمل.. علشان تبقي ناقد واحترم كلامك وأفهمه لازم تكون بتكتب كلام محترم وهادف أفهم منه فين أخطائي وأصلحها وتضيفلي شيء جديد، ودا مبيحصلش غير بعد مشاهدة العمل، وفي الحاله دي بس لازم أسمعلك لأنك هتضفلي شيء.. أنا فخورة جدا أني اشتغلت في مسلسل الملك".