أول تعليق لتامر عاشور على أزمة صورته مع الطفلة مريضة السرطان

علق الفنان المصري تامر عاشور على الانتقادات التي تعرض لها بسبب صورة نشرها جمعته بطفلة مريضة سرطان، من إعلان لصالح مستشفى أيادي المستقبل لأورام الأطفال، مع تعليق: "لا خدي أنتي أنا صايم يا فاطره بحبك".

تامر عاشور كتب، على صفحته الشخصية بموقع "الفيس بوك": "صباح الخير - أنا طول حياتي ومشواري عمري ما اتريقت على حد سليم علشان اتريق على مريض حاش لله - واللي أخد كلامي تريقه على مريض نفوسهم ضعيفة وهم اللي مرضى بيفرقوا بين المريض والشخص الطبيعي".

وأضاف: "لو نزلت صورتي مع أي طفل "اللي هو غير مُكلف بالصيام " وقولتله ب أي طريقة "متشربش مياه قدامي يا فاطر " أو "خد دي يا فاطر أنا صايم" حد هيتكلم ؟ مستحيل علشان طفل طبيعي.. لكن المريض لاااااا منهزرش معاه زي الطبيعي علشان هو مريض ونفضل نقوله مريض مريض مريض ونحسسه بمرضه من تعاملاتنا.

وتابع: "المرض الحقيقي هو التفرقة بين أطفالنا اللي بصحة جيدة ربنا يديهم كل الصحة وأطفالنا اللي ربنا اختارهم للمرض، المرض الحقيقي هو أن فكرة " المعايرة" جاتلك قبل 100 فكرة تانية ممكن تجيلك من جمال البنت وضحكها وبهجة الصورة".

واستطرد: "وللأسف شوفت كمان حاجه غريبه جدا ناس كتير قوي محسوبين على "هامش هامش هامش المجال الفني " عمرهم ما شافو مني حاجه وحشه غير أني مباديهمش مواعيد لاقيتلهم تعليقات كأنهم ما صدقوا لاقولي غلطة وانصحهم "العمر بيجري حاولو تعملو حاجة لنفسكم أولى".

واختتم كلامه، بقوله: "البنت اللي في الصورة فضلت في حضني طول تصوير الإعلان وبحبها جدا جدا، ومتفقين أنا وهي على حاجات كتير قوي قوي هنعملها".