هاله صدقي تدافع عن يسرا والهام وليلى :حضور الفرح واجب و"محدش يحاسب غيره"

عبر صفحتها الرسمية على الفيس بوك دافعت الفنانة هالة صدقي عن حضور زميلاتها في الوسط الفني حفل زفاف نجل أحد رجال الاعمال والذي أقيم في الجونة عقب جنازة الفنان سمير غانم.

وكتبت "زي ما العزاء واجب الفرح كمان واجب ،الفرح يوم في العمر وخصوصا لو حد عزيز عليه جدا ومنتظر اشاركه اللحظه دي ،المعروف جدا ان اي فنان واولهم الفنان سمير غانم وينزل يعرض ويضحك ويسعد جمهوره لكن قلبه من جوه كله حزن واكبر مثال العظيم عادل امام دفن مصطفي متولي صاحبه وجوز اخته الظهر ونزل يعرض بليل وبما بعد ما نزلت الستاره انهار ،ومش عادل بس لا في غيره وغيره وغيره ، للاسف الفنان بيبقي مطلوب منه فوق طاقته واصحابه وحبايبه منتظرين منه اكتر ،عمر الحزن ما كان بلون الاسود او البكاء ،ولاد سمير النهارده مؤكد لابسين ملون علشان مامتهم ما تعرفش باللي هما فيه هل ده معناه انهم مش زعلانين ومقهورين علي باباهم ،وهي قدرات ممكن حد يقدر يتغلب علي احزانه وناس لا ،وعلي فكره انا مكنتش معزومه علي الفرح اللي زملائي كانوا فيه ،كنت معزومه في فرح تاني خالص والنهارده كمان كان عندي فرح حد من اعز اصدقائي ،كلنا عارفين الاصول ان لما حد يموت نقفل التلفزيون وبلاش مزيكا وحاجات كلنا عارفينها، لكن للاسف في ظروف خارجه عن الاراده وبدل ما نحاسب البشر واحنا عندنا رب هو المسئول عن اللي في القلوب ،ندعي للزميله والاخت العزيزه دلال ان ربنا يقومها بالف سلامه وترجع لبيتها وولادها وتتحمل فراقها لحبيب عمرها شكرا لتفهمكم".

وذلك بعد حالة الغضب على مواقع التواصل الإجتماعي والسوشيال ميديا بعد انتشار صور ليسرا وليلى علوي وإلهام شاهين وبوسي شلبي عقب انتشار صور لهم في حفل زفاف بعد جنازة سمير غانم.