مراد مكرم يعلق على أزمة "البوركيني"
علق الفنان المصري مراد مكرم على أزمة "البوركيني"، والتي أثيرت بعد منع إحدى الفتيات من السباحة به داخل إحدى القرى السياحية.
مراد مكرم كتب، على حسابه الخاص على موقع "الفيس بوك": "مصر كبيرة قوي يا جماعه ، ما هياش اوضه وصاله علشان كل سنه نفس الخناقات و الصعبانيات و الكره و الشتيمه، مصر فيها آلاف الكيلومترات من الشواطئ الجميله و آلاف بل ملايين حمامات السباحه، ليه ما يتمش تقسيم الشواطئ الي شواطئ للبوركيني و شواطئ للمايوهات العاديه...ايه الي يمنع يعني بدل صداع كل سنه ده".
وأضاف: "معظم الفنادق بالذات في المنتجعات عندها اكتر من حمام سباحه، تخصص منهم للبوركيني و منهم للمايوه العادي وخلاص...ايه المشكله!!!!! و بعدين لو مكان حاطط لنفسه قواعد ،هو حر ،ليه نروحله طالما لا تنطبق علينا الشروط...لو مكان عام حقك تعترضي بس طالما مكان خاص من حقه يحط القواعد الي شايفها في مصلحة مكانه. ومن حقك تقاطعيه".
وتابع: "قصه قصيره حزينه حصلت من كام سنه في شبرا و معظم الشبراويه سمعت عنه.. .احد المطاعم الي اكتشفنا بعد كده ان مالكه اخواني ،كتب علي المحل مطلوب عمال و موظفين و تحتها المسيحيين يمتنعون.... و الكلام وصل للبابا شنوده في اجتماعه الاسبوعي....من غير ولا تشنج ولا عصبيه ولا كلام كتير ،البابا رد و قال الي مش عايزنا مش عايزينه......و بكل بساطه عدت بضعة شهور و قفل المطعم لصاحبه الغبي لانه عمل عداوه مع نص سكان شبرا و جزء كبير من النص التاني الي مش متربي علي التفرقه ....و عدت السنين و قفل خالص في مصر تقريبا".
وأكمل: "الحياة فيها من المشاكل الحقيقيه ما يكفينا وزياده....كفايه هري بقي في الموضوع ده ،الحلول موجوده للي عايز يفكر في حل.. طبعا الصح ان كل واحد حر ما لم يضر بأحد... بس ده ممكن يبقي حل مؤقت لحين تغيير المزاج العام المصري الي قبول الاختلاف و قبول الآخر دون تعالي من طرف ضد الآخر".