إيمان السيد تدافع عن ياسمين عبدالعزيز: عمرها ما اتغيرت

دافعت الفنانة المصرية إيمان السيد عن الفنانة ياسمين عبدالعزيز، بعد الهجوم الذي تعرضت له مؤخرا من عائلة طليقها رجل الأعمال محمد حلاوة.

إيمان السيد كتبت: "مش هبالغ لو قلت ان ياسمين من أجدع الشخصيات اللي قابلتها، انا معرفتي بيها داخلة على حوالي ١٤ سنة دلوقتي ( فترة طويلة اتغير فيها ناس كتير، وناس أكتر كانوا قريبين ومابقوش موجودين) وياسمين عمرها ما اتغيرت".

وأضافت: "طول عمرها جدعة وبنت ناس ومحترمة وبتفهم في الأصول، بتحب شغلها وبتحب كل الناس اللي معاها يطلعوا بأحسن صورة، وزي ما خالد الصاوي قال (وبضم صوتي لصوته) : ياسمين عبد العزيز واضحة وصريحة ومش بوشين وما بتجاملش ودا أريح للناس كلها، حقيقي التعامل مع انسانة زي ياسمين مريح، خاصة لما تكون انت كمان انسان دوغري ومش منافق ومالكش في اللوع".

وتابعت: "ياسمين عمرها ما اتغيرت معايا في عز ما كان فيه ناس كنت فاكراهم قريبين مني وكانوا يقولولها : ما كفاية ايمان السيد بقى ( وحتى دا عرفته من برة مش منها لان طول معرفتي بيها عمرها ما قالت لي ولا قالت قدامي حاجة تضايقني)، ربنا يكرمها ويرزقها كل خير ❤".