ريهام سعيد توجه رسالة شكر لطبيب: تحولت من جثة هامدة لواحدة دبت فيها الحياة فجأة

وجهت الإعلامية المصرية ريهام سعيد رسالة شكر لطبيب وصفته بانه أنقذ حياتها، وذلك بعد إصابتها مؤخرا بفيروس "كورونا" المستجد.

ريهام سعيد نشرت صورة للطبيب، على حسابها الخاص على موقع "انستجرام"، وعلقت قائلة: "اشتغلت لمده ٢٠ سنه مع جميع اطباء مصر و العالم في جميع التخصصات و بقيت بفهم في الطب زي ما اكون متخرجه من اعرق كليات الطب . احنا كنا بنعاني في فتره من قله امكانيات و لكن طول عمرنا احسن موارد بشريه في العالم".

وأضافت: "الراجل ده او البني ادم ده او الدكتور ده راجل لازم كلنا نفتخر بيه زي كتير من اطباءنا العظام . الاستاذ الدكتور حسام حسني بجد شكرا بعد ربنا انقذتني انا كنت متاكده اني مش هارجع البيت الفيروس مرعب و اعراضه قاتله و صحيح لسه العلاج طويل و موءلم و الكورتيزون خلاني ميس بيجي😂 لكن رجوعي لاولادي بالدنيا".

وتابعت: "فكره ان اد ايه انا شفت ان اطباءنا فاهمين ابعاد الفيروس و علاجه في الوقت القصير ده و التعامل مع المرض بالاحتراف ده و هو مرض مجهول تبين اد ايه احنا بنفهم و بنتطور و بنحقق . كل التحيه و التقدير لاطباء مصر ربنا يديمهم علينا من نعم الله سبحانه و تعالي .الف حمد و شكر و شكرا لكل كلمه دعاء انا من جثه هامده لواحده دبت فيها الحياه فجاه فعلا الدعاء لله عن يقين كل الي الواحد محتاجه".