ملخص تصريحات ياسمين عبدالعزيز في برنامج "معكم": كنت بموت ووصيت أخويا على أولادي.. ودعاء يوم عرفة رد فيا الروح تاني

حلت الفنانة المصرية ياسمين عبد العزيز ضيفة على برنامج "معكم" تقديم الإعلامية منى الشاذلي على قناة "cbc"، في أول ظهور لها بعد تعافيها من أزمتها الصحية الشديدة التي تعرضت لها مؤخرا.

ونرصد ملخص تصريحات ياسمين عبد العزيز خلال الحلقة كالتالي:

- كنت داخلة أعمل عملية عند دكتور النسا اللي ولدني في بنتي فأنا عندي مرض اسمه أكياس شوكلاتة من وأنا عندي 16 سنة وهي منتشرة عند بنات كتير، عملت العملية دي حوالي 5 مرات وكنت بدخل أعمل العملية ومحدش يعرف حاجة عني وأعود لشغلي عادي فأنا تأقلمت على الأكياس والالام بتاعتها بقت صاحبتي وأعيش وأتعايش معها.

- رحت للدكتور قولتله عاوز أعمل العملية بعد مسلسل (اللي مالوش كبير) ومن قتها مشفتش يوم انبساط وجالي مرتين كورونا ففي شهرين أجريت 4 عمليات منهم عمليتين في يوم واحد وبعدها دخلت في أزمتي الصحية.. وبعد خروجي من العملية شعرت بألم رهيب وكنت بقولهم (أنا بموت) وخرجت من العملية مش فاكرة حاجة بسبب المخدر والمسكنات التي حصلت عليها بسبب الآلام التي أشعر بها.

- بعدها بكام يوم قالولي لو معملتش العملية كمان ساعة هتموتي والقولون اتخرم وجالي تسمم في الدم وعملولي العملية والدكتور عصام شلباية أنقذ حياتي قالي انا داخل اعمل العملية والدنيا بايظة خالص وعارف أن الموضوع كان صعب جدا، وأنا كنت حاسة إني مش هطلع من العملية وقولت لاخويا الكبير (خلي بالك من ياسمين وسيف) لاني فعلا حسيت اني داخلة مش طالعة.

- طلعوني من العملية على العناية المركزة وكان راكب خراطيم في انفي وفمي وبطني وكالونات في رقبتي وجلست في العناية المركزة 5 أيام واللي بيدخولولي كانوا حاسين اني خلاص والدكاترة قالوا ادعولها دي بتعيش اليوم بيومه، وأنا في العناية المركزة دخلت على جهاز اللي بيدخل عليه 100 حالة بيعيش 10 منهم فقط وقالوا هي اتحطت على جهاز اللي بيدخل فيه مبيطلعش.

- جالي وقت وانا في العناية المركزة شعرت إني خلاص وقولتلهم مش قادرة أكمل بسبب الالام والتعب وقولتلهم شيلوا كل حاجة انا خلاص هبقى مرتاحة اني اروح لربنا، الموضوع كان صعب وكنت حاسة إن بكرة مش هبقى موجودة وروحي بتتسحب، وأول مرة أحس بشعور إني خلاص هموت.

- أحمد العوضي نزل بوست مرضي في يوم عرفة والناس دعتلي وكأن الدعاء كله كان من نصيبي، بعد اليوم ده حسيت إن روحي ردت فيا تاني، واتحسنت حالتي، من واحدة كنت بموت لواحدة سخر ربنا الناس كلها تدعيلي.

- الأزمة الصحية التي تعرضت لها خسرت بسببها 15 كليو وكان تحت عيني أسود كأني واحدة تانية في المستشفى، وبعد ما عملت العملية طلعت الغرفة وبدأت أتكلم وأستعيد وعيي، ببص لقيت معدتني والأمعاء برا وسألت إيه ده قالولي إن ده كان لازم يحصل بسبب التسمم.

- أنا مبخافش من الموت بالعكس هو أحسن من الحياة اللى بنعيشها دلوقتي.. بس كل اللي شاغلني ولادي.. وأنا بحس إنى خلاص هموت، نسيت كل اللي حواليا وفكرت إنى رايحة لربنا لوحدي.

- تعرضت لعديد من الشائعات خلال فترة مرضي، منها الوفاة وطلاقي من أحمد العوضي وخضوعي لعمليات تجميل.

- في سويسرا عملت العملية الرابعة دخلوا الأمعاء جوا بطني، وبعد 3 شهور من مرضي مسكت التليفون وبدأت أبص على كلام الناس، محبتش حد يشوفني وأنا تعبانة وشكلي تعبان ومشفتش نفسي وأنا تعبانة في المراية ورافضة أتصور معاهم، مرضيتش أنزل من سويسرا بعد ما خلصت إلا وأنا ياسمين وماشية ياسمين وقوية وقولت عندي أولاد ولازم أكمل.

-اتعقدت من جملة "وحش الكون" وحضن العوضي اللي جابلي الكافية، كنا بنصور مشهد حضن أحمد العوضي في مسلسل "اللي مالوش كبير" في مكان فيه ناس كتير وأنا مكسوفة والناس بعد كل الحضن كانت مبسوطة في الشارع.