حمو بيكا: الكلام ده مخرجش من لساني
علق مطرب المهرجانات حمو بيكا على عدة تصريحات نسبت له مؤخرا، مؤكدا أنه لم يتفوه بها على الإطلاق.
حمو بيكا كتب، على حسابه الخاص على موقع "الفيس بوك": " توضيح هام في البداية صباح الخير علي كل اخواتي وجمهوري في مصر والوطن العربي .. حابب بس اوضح كام نقطة كدة الصحافة عماله تتكلم فيهم بدون اي دليل وكلام مخرجش من لساني وتحريف لبعض الكلام لاشعال الرأي العام والسوشيال ميديا".
وأضاف: "اول نقطة جريدة من ضمن الجرائد روجت اشاعه اني عملت لايف واتحديت فيه استاذ (هاني شاكر ) ونقابة المهن الموسيقيه واني هخالف قوانين النقابه وهغني غصب عن القرار.. اولاً انا قولت دي موجة وبإذن الله هتعدي وهنرجع نغني في مصر تاني مقولتش انا بتحدي القرار والاستاذ هاني شاكر .. لاني خامس مره اتوقف وعمري مخلفت قوانين النقابه نهائي ومن كلامهم جميعاً وعلي رأسهم النقيب هاني شاكر .. فياريت الجرايد اللي بتحور الاخبار علي دماغها تكتب اللي بيخرج عن لساني انا وميكتبوش اللي علي دماغهم هما .. لان دي امانه مفروض حضرتك كصحفي او صحفيه تأدوها علي اكمل وجه .. ومن هنا بقولكم انا عمري ما هتحدي قرار نقابه او هخالف اي قانون للنقابه وانا محترم كل قرار للنقابه".
وتابع: "تاني نقطة هي هي نفس الجرايد كاتبه اني قولت ان اغلب الموظفين عندي في الشركة مهندسين ومحاسبين وكل يوم الصبح بجيبلهم طعميه والكلام الفارغ ده .. مفيش طبعاً الكلام ده انا مؤدي مهرجانات ايه دخل المهندسين والمحاسبين بشغلي ؟ والكلام ده برضه مخرجش من لساني نهائي والي كاتب كده شخص عديم الضمير ولازم فعلياً يتحاسب علي اللي عامله .. انا فريقي مكون من موزعين وشعراء وفريق السوشيال ميديا وجرافيك ومونتير وعمال نظافه وبوفيه فقط.. اما بالنسبه للمطاعم فعندي عمال كتير الحمد لله .. وحاليا بجهز لمطعمي الجديد وبالفعل في مهندس ديكور لعمل تشطيبات المطعم ومش شغال عندي او معايا ده راجل بيأدي شغله فقط.. وطبعاً كل المهندسين والمحاسبين علي دماغي من فوق وليهم كل الاحترام والتقدير".
واختتم كلامه، بقوله: "اختم كلامي .. ياريت كل صحفي وكل جريده يبطلو بجد يقولو كلام يولع الدنيا .. لان بجد دي امانه وامانه هتتحاسب عليها قدام ربنا ..قولي بالله عليك لما تيجي تقف قدام ربنا هتقوله ايه ؟ هتقوله انا كذبت عشان اركب التريند؟".