تامر حبيب يشيد بمسلسل "مين قال": أكتر مسلسل ماسك نفسه في رمضان

أشاد السيناريست المصري تامر حبيب بمسلسل "مين قال" بطولة الفنان جمال سليمان، ووصفه بأنه أكثر مسلسل "ماسك نفسه" في رمضان هذا العام.

تامر حبيب كتب: "في رأيي المتواضع، و من بين المسلسلات اللي شفتها الشهر ده، ينفع اقول ان المسلسل ده هو اكثر مسلسل ماسك نفسه، و مكتوب و متنفذ ببساطة و اتقان و ايقاع رشيق و ممتع… لم يكن في خطتي ان اتابعه خلال الشهر الفضيل و كنت ناوي أأجل الفرجة عليه لبعد رمضان، لاني ماكنتش حاسس انه مسلسل رمضاني، و بعد ما شفته، مازلت مُصِر انه هايتشاف اكتر بعد رمضان".

وأضاف: "بس اولاً بسبب اني سمعت من كذا حد بأحترم رأيهم و بأقدر ذوقهم ان المسلسل حلو و مختلف، و ثانياً لأن مجدي امين مؤلف المسلسل هو صاحبي و اعرفه من و هو بيخطو اول خطواته كسيناريست شديد الموهبة و الحساسية، و نلت شرف انه كان من ضمن زمايلي العزيزين في ورشة مسلسل جراند اوتيل، و ثالثاً علشان نادين خان مخرجة و انسانه لها طعم و روح بتاعتها هي و مش شبه حد و لا هي من القطيع و لا ماشية مع الرايجة و انا باحب طعمها ده".

وتابع: |و رابعاً علشان انا بأشوف ان احمد داش ده ممثل بديع و موهوب و ذكي و شاطر و عمره ما خذلني و لا مابسطنيش في اي دور عمله من يوم ما ابتدئ يمثل، و خامساً علشان انا بأحب نوعية الاعمال اللي بتتكلم عن المرحلة العمرية اللي المسلسل بيتكلم عنها، و سادساً لإن مع تقدم الايام من اول رمضان وقع مني و بتعمد مسلسلات اخترت بمحض ارادتي و حفاظاً علي صحتي و ضغطي و نسبة السيولة في دمي ان امتنع تماماً عن متابعتها و هم كثيييييييييييييييير مع الاسف مع الألم، فأصبح عندي متسع لمتابعة ما ينسيني قسوة ما رأيت، فرجعت و لاول رمضان في حياتي الي المنصات العالمية و متابعة ما ينقي و يطهر روحي و ذوقي و عقلي و صحتي".

وأكمل: "و من ٣ ايام قررت قبيل النوم ان اتابع اول حلقة من ( مين قال ) و مانمتش غير بعد ما خلصت اول ٦ حلقات، و خلال يومين اتنين بس كنت قد انتهيت من ١٥ حلقة ممتعة و شابة و رشيقة و مبهجة و اوريچينال و مش شبه حاجة، و صادقة و بسيطة. ١٥ حلقة معمولين بروح و قصدية و اخلاص و صدق. شوية شباب تفرح القلب الحزين و يحسسوك ان فيه امل، و ينورولك و بقصدية الضلمة اللي اتسبب فيها غيرهم الله يسامحهم و يغفرلهم … ممثلين حلوين قوي و شطار قوي و فريش قوي و مصدقين اللي بيعملوه عشان بيقولوا كلام يتحس، و تحت ادارة مخرجة بتحس…. الخلاصة يعني، انتوا بسطتوني و انعشتوني و ابهجتوني…. ينصر دينكم يا حلوين…. انا في غاية الشكر و الامتنان لكل من شارك قدام و ورا الكاميرا في كل هذة البهجة البسيطة".