تامر فرج يشيد باستخدام أحمد مكي أغنية "ستو أنا" من المسلسل المنافس له "مكتوب عليا" لأكرم حسني

أشاد الفنان المصري تامر فرج باستخدام أحمد مكي أغنية "ستو أنا" من المسلسل المنافس له "مكتوب عليا" بطولة الفنان أكرم حسني، بدون أي حساسية أو حسابات.

تامر فرج كتب، على حسابه الخاص على موقع "الفيس بوك": "اللى حصل فى مسلسل #الكبير٦ ده مينفعش يعدى كده من غير ما الواحد يتكلم عنه.. ان فنان كبير زى احمد مكى يستخدم اغنية مسلسل كوميدى منافس لممثل كوميدى كبير زى أكرم حسنى بدون ما يكون فى اى حساسيه او حسابات نجوميه ده شئ لازم نقف عنده و نمدح فيه من هنا لبكره".

وأضاف: "لأن هى دى الروح اللى بين الزملاء اللى لازم تكون واللى اعرف انها موجوده عند مكى و أكرم بحكم معرفتى الشخصيه بيهم... مفيش نفسنه... مفيش منافسه... مفيش غل ولا حقد ولا مشاعر سلبيه... كلنا بنفرح لنجاح بعض وكلنا نتمنى النجاح لبعض لأن احنا مش فى منافسه احنا فى مغامره وبنلعب لعبه بنحبها كلنا و بنشجع بعض و بنشجع اللعبه الحلوه ".

وتابع: "المنافسات والترندات دى حاجه اخترعتها السوشال ميديا والصحافه اللى عايزه تزغزغ مشاعر الجمهور بأى شطه وخلاص... اى علاقات ملهلبه واى حرقان عشان الاخبار تبقى مشعوطه وللأسف كلنا بننساق ورا الهرى ده و بننسى احيانا مشاعرنا الانسانيه وفطرتنا الراقيه وبنصبح زملاء أعداء.. فيجى ناس زى مكى وأكرم وغيرهم يرجعونا لمشاعرنا الجميله".

واختتم كلامه بقوله: "ويفكرونا بحكمه كنت دايما بقراها على مكتب ابويا فى اتحاد الاذاعه والتلفزيون على البتاعه اللى مكتوب عليها اسمه فوق المكتب : "Life is am adventure not a competition and there is room for all" الحياه مغامره وليست منافسه وهناك متسع للجميع الله يرحمك يا ابويا .. شكرا لمكى وأكرم ولكل الكرو فى المسلسلين الجمال اللى رجعولنا شكل الكوميديا اللى بنحبها❤️".