بالصور.. دعاء فاروق تؤدي مناسك العمرة

نشرت الإعلامية المصرية دعاء فاروق مجموعة صور لها أثناء أدائها مناسك العمرة، وذلك على حسابها بموقع "انستجرام".

دعاء فاروق علقت على الصور، بقولها: "رجعت من احلي رحلة في الدنيا رحلة نقاهة من الهموم . من الضغط . رحلة علاج من اي زعل من اي وجع قلبي انشرح فعليا اتغسل نضف والله العظيم ده الاحساس حرفيا زى ما يكون كان معبي وشايل كتير ورحت فضيت هناك ونضفته ..والله العظيم ما هو كلام وخلاص والله العظيم أنا صادقة في كل كلمة انا استمتعت في الرحلة دى بكل المتع اللي شفتها وعشتها في الدنيا .. اي سفرية في الدنيا صفر علي الشمال جنب السفرية دى بالتحديد ".

وأضافت: "قررت أوثق احلي رحلة في حياتي بالصور والفيديوهات وهنزلها تباعا .. العالم كله هناك بيصور كل لحظة ... كل الجنسيات كل الأعمار رجالة وشباب وحتي الستات الكبار جدا في السن فاتحين الموبايلات وبيصوروا لاهاليهم الجمال اللي احنا فيه ... الناس بتطوف وفاتحين لايف وأهاليهم علي الناحية التانية بيبكوا بكاءا حارا ... جنسيات كتير محدش فاهم لغة التاني إنما بيدعوا بنفس الدعاء وبيعملوا نفس المناسك وفي قلوبهم نفس الحب والاشتياق للعبادة في بيت ربنا قبلة المسلمين في العالم أجمع ... انا بقيت كل يوم افتح الكاميرا واكلم ولادى وجوزى واخواتي وأصحابي واقولهم متعوا عنيكم باحلي خلفية في الدنيا انا ورايا الكعبة يا بشر الكعبة علي بعد خطوات مني ... انا في مسجد النبي يا ناس النبي عليه افضل الصلاة والسلام موجود هنا في المكان اللي انا واقفة فيه ده ".

وتابعت: "بنتي فتحت المكالمة الفيديو كول لقيتني واقفة وورايا الكعبة قالت لي بمنتهي البساطة و الانبهار واااااااو المنظر حلو قوي قلت لها ده بيت ربنا يا روكي متعي عينك مجرد النظر للكعبة عبادة ... بقي نقف نتصور جنب نافورة ولا زرعة ولا برج حديد ولا سور اسمنت واحنا فرحانين ونيجي عند اطهر بقاع الأرض في بيت ربنا في الحرمين الشريفين والناس تشكك في النية وتقولك أعبد ربنا وانت ساكت ومتتصورش ومتبينش ومتقولش ومتعملش ... ده انا عاوزة امشي بميكروفون واقول انا عملت عمرة يا ناس ده شرف ما بعده شرف وتكريم ما بعده تكريم ... اخيرا لبيت الدعوة يا رب شكرا يا رب كان بقالي اتناشر سنة مدخلتش هنا واخيرا ربنا كتبها لي".

وأكملت: "انا فاكرة زمان لما حجيت ورجعت بقيت ادور علي الأذان في التلفزيون عشان اشوف الكعبة اللي انا لسه كنت واقفة عندها .. دلوقتي الوضع اتغير مش لازم نستني نشوف الأذان عشان نشوف شكل الكعبة. كل واحد راح الكعبة جت له الفرصة أنه يلقط لنفسه صورة مع اطهر بقعة في الأرض . البقعة التي تستقر فيها الكعبة شامخة في منتصف الكرة الأرضية بالتمام و الكمال .. محور الكون التي يلتف حولها باقي الكون وتتحرك البشريه من حولها كعقارب الساعة وتتسع الدائرة وكلما اتسعت كلما بعدنا واشتقنا وتمنينا أن تضيق مرة اخري".